भांगरभूंय | प्रतिनिधी
हें झूज जर वेळारूच थांबलें ना जाल्यार घडये जग तिसऱ्या म्हाझुजा वटेन वतलें आनी तातूंत पुराय जग हुलपून वतलें.
इस्रायल आनी अमेरिकेन इराणाचेर हल्लो करून मध्यपुर्वेंत झुजाक सुरवात केली. आपल्याचेर हल्लो जातलो हाची कल्पना इराणाक आशिल्लीच. अमेरिकेचे राष्ट्राध्यक्ष डोनाल्ड ट्रम्प हांणी जूनांत इराणाक तशी धमकी दिल्ली. तरी लेगीत इराण देश गाफील रावलो. इस्रायल आनी अमेरिकेन इराणाचेर हल्लो करपाची फुलप्रूफ येवजण आंखिल्ली. ह्या येवजण्याची इराणच्या गुप्तचर यंत्रणेक कसलीच म्हायती मेळूंक नाशिल्ली. हें इराणच्या गुप्तचर यंत्रणेचें अपेसूच म्हणचें पडटलें. ताचें व्हड मोल तांकां मेजचें पडलें.
इराणाचे सर्वोच्च फुडारी आयातुला खामेनी आनी तांचे खूबशे विस्वासू लश्करी अधिकारी एकाच वेळार मारले. खामेनी हांच्या मरणा उपरांत इराण आपल्याक सहजतायेन शरण येतलो अशें अमेरिकेक दिसलें. पूण जालें उरफाटेंच. खामेनी हांच्या मरणा उपरांत इराण पेटून उठलो. अमेरिकेक शरण वच्चे परस तांणी स्वाभिमानान तांचे कडेन झुजपाचें थारायलें. इस्रायल आनी अमेरिकेक जशाक तशी जाप दिवपाचें थारावन तांणी इस्रायलाच्या मुखेल शारांक लक्ष्य केलें. इतलेंच न्हय तर आखातांत ज्या ज्या देशांनी अमेरिकेचे लश्करी तळ आसात थंय हल्ले सुरू केले. ताका लागून झुजाची व्याप्ती वाडली. अमेरिका आनी इस्रायलानूय इराणाच्या तेहराना सयत मुखेल शारांचेर लक्ष्य करून क्षेपणास्त्राचो मारो सुरू दवरलो. तरी लेगीत इराणान माघार घेतली ना. खामेनी हांच्या मरणा उपरांत इराण शरण येतलो आनी आपलें सहजतायेन जैत जातलें अशा आविर्भावात आशिल्ल्या अमेरिका आनी इस्रायलाक सप्तक जायत आयलें तरी हें झूज थांबोवंक आयलें ना. उरफाटें झुजाची व्याप्ती वाडली. ती इतली वाडली की स्वता डोनाल्ड ट्रम्प हांकां हें झूज आनीक तीन ते चार सप्तकां चलतलें अशें सांगचें पडलें.
जर हें झूज आनीक तीन ते चार सप्तकां चल्लें जाल्यार ताची झळ फक्त ह्या तीन देशांक वा आखातांतल्या देशांकूच बसतली अशें ना जाल्यार पुराय जगाक हाची झळ बसतली. ताची सुरवातूय जाल्या. इराणान इंधन व्हरपी बोटीं खातीर हॉर्मुझची सामुद्रधुनी बंद केल्या. ह्या सामुद्रधुनीतल्यान फक्त चीनाच्या बोटींकूच वचपाक परवानगी आशिल्ल्याचें इराणान म्हणलां. हेर देशांच्या बोटींनी जर ह्या सामुद्रधुनीत प्रवेश करीत जाल्यार त्या बोटींचेर हल्लो करतले अशी इराणान धमकी दिल्या.
हॉर्मुझची सामुद्रधुनी इंधनाची येरादारी करपी बोटीं खातीर खूब म्हत्वाची सामुद्रधुनी आसा. आखाती देशांतल्यान हेर देशांक जावपी तेलाची पुरवण ह्याच सामुद्रधुनींतल्यान जाता. जर ही सामुद्रधुनी बंद जाली जाल्यार पुराय संवसारांत इंधनाचो व्हड प्रमाणांत उणाव निर्माण जातलो. हाचो परिणाम पुराय जगाचेर व्हड संकश्ट येतलें. हॉर्मुझच्या सामुद्रधुनींतल्यान दीसपट्टें दोन कोटी बॅरल इंधनाची येरादारी जाता. तशेंच कतार आनी यूएई ह्या अरब देशांतल्यान सैमीक वायूची निर्यात लेगीत करतात. इराणचे हे कारवायेक लागून ह्या सागरी क्षेत्रांतल्यान जावपी इंधनाची येरादारी खंडीत जाल्ली आसून संवसारीक पुरवण सांखळी संकश्टांत सांपडल्या.
फाटल्या सप्तकांत आंतराष्ट्रीय बाजारांत इंधनाचें मोल 72 डॉलर इतलें आशिल्लें. आतां तें 81 डॉलरा मेरेन पावलां. जर हें झूज आनीक कांय दीस अशेंच सुरू उरलें जाल्यार आंतरराष्ट्रीय बाजारांत इंधनाचें मोल प्रती बॅरल 200 डॉलरांचेर पावतलें अशें जाणकार सांगतात. हाचोच अर्थ हें झूज जरी आखातांत सुरू आसलें तरी ताची झळ पुराय जगाक बसूंक शकता. तेलाचें मोल वाडलें जाल्यार म्हारगाय वाडटा अशें अर्थशास्त्र सांगता. ताका लागून फुडारांत म्हारगाय आनीक वाडूंक शकता. हाचो फटको सर्वसामान्य लोकांकूच बसतलो. ताका लागून हें झूज जाता तितले बेगीन सोंपचें हेंच जगा खातीर फायद्याचें आसा. हें झूज बेगीन सोंपचें हे खातीर आंतरराष्ट्रीय समुदायान यत्न करूंक जाय. झूज थांबोवपा खातीर संयुक्त राष्ट्र संघान हस्तक्षेप करूंक जाय. संयुक्त राष्ट्रसंघान शांतीसेना धाडून हें झूज आडावंक जाय. हें झूज जर वेळारूच थांबलें ना जाल्यार घडये जग तिसऱ्या म्हाझुजा वटेन वतलें आनी तातूंत पुराय जग हुलपून वतलें.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
