भांगरभूंय | प्रतिनिधी
गोंय जैवविविधताय मंडळाच्या अहवालांतल्यान शिटकावणी
पणजीः आक्रमक प्रजातींक लागून मुळावी वनस्पत धोक्यांत आयल्या. अनियोजीत झाडांचे लागवडीक लागून रानवटी वखदी वनस्पतीक मार बसपाक शकता. गोंयचे वनस्पतीचो अभ्यास करून तांचे संवर्धन करप गरजेचें, अशें गोंय जैवविविधताय मंडळाच्या अहवालांत म्हणलां.
जैवविविधताय मंडळान तयार केल्ले जैविविधताय कृती आराखडो अहवालांत वनस्पती जैवविधताय आनी वखदी झाडां ह्या विशयांचेर गोंय विद्यापीठाचे बॉटनीचे प्राध्यापक डॉ. एम के जनार्थनम आनी तांच्या पंगडान केल्ल्या विश्लेशणांतल्यान ही म्हायती मुखार आयल्या.
ह्या विश्लेशणांत सांगलां आक्रमक प्रजाती गोंयच्यो मुळावो प्रजातींक काबार करपाक उठल्या. उक्ते सुवातेर जावपी अनियोजीत झाडां लावपाचो प्रकार हो सरळ रानवटी वखदी वनस्पतीचेर घात मारपी आसा. तशेंच झाडां आनी लोकांमदीं पयस जाल्लो संबंद हो धोको वाडयता. हवामान बदल अभ्यासा खातीर मुळोवो फॅनोलोजी शास्त्र डेटा ना.
गोंयाक भरपूर अशें वनस्पतीचें बेसांव मेळ्ळां, मात हे वनस्पतींचो अभ्यास करपाक जाय. वखदी वनस्पतींचें संग्रहालय करपाक वाव आसा आनी डिजीटल तंत्रगीन्यानाचो वापर करून हे वनस्पतींचे सरंक्षण तशेंच तांचो रिकोर्ड दवरचो. काय विशिश्ट परिसंस्था जी धोक्यांत आयल्या जशे की पठारावेली वनस्पत, करड आशिल्ल्या वाठारातली जैवविविधताय, रेवेंचे दोंगर हाचे कडेन खाशेलें लक्ष दिवचें. खावपा योग्य आनी वापराक येवपी रानवटी प्रजाती लागवडी सकयल हाडप गरेजेचें आसा, अशी सुचोवणी अहवालांत दिल्या.
राज्यांतल्या पुराय वनस्पतींची म्हायती दिवपी अहवाल थळावीं नांवां, तांकां वळखपाच्यो पध्दती, फोटो सयत इंग्लीश, कोंकणी आनी मराठी पुस्तक तशेंच डिजीट आवृत्तींत उजवाडाक हाडपाक जाय. राज्यांत वनस्पती संग्रहालय स्थापन करचे ना जाल्यार गोंय विद्यापीठांत आशिल्लें सग्रहालय बळीश्ट करचें. सुरवातेक गोंयच्या कांय पंचायतींतल्यान कांय वनस्पती एकठांय करपाक यत्न करचो. थळावे वनस्पतीचें संरक्षण सुनिश्चीत करून आक्रमक प्रजातींचें नेमान आनी नियोजीत रितीन निर्मुलन करपाचो सल्लो अहवालांत दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
