भांगरभूंय | प्रतिनिधी
मडगांवः आके-मडगांवच्या सार्वजनिक श्री गणेशोत्सव युवक मंडळान वाठारांत भव्य गणपतीचे देवूळ बांदपाचो संकल्प केला. ह्या देवळाच्या बांदकामा खातीर निधी एकठांय करपाच्या हेतान मंडळान ‘देणगी कूपन येवजण’ जाहीर केल्या. जातूंत पयलें इनाम 2 बीएचके फ्लॅटा वांगडा 15 कार जिखपाची संद मेळटली. ही म्हायती मंडळाचे अध्यक्ष तुळशीदास कोरगांवकार हांणी पत्रकार परिशदेंत दिली.
1983 वर्सा स्थापन जाल्लें हें मंडळ अंदूं 44व्या वर्सांत पावल घालता. फाटल्या चार दशकां सावन समाजीक आनी सांस्कृतीक मळार सक्रीय आशिल्ल्या ह्या मंडळान देवूळ बांदपा खातीर सुवात संपादीत केल्या. ही सुवात मेळोवपाक भौशीक बांदकाम मंत्री दिगंबर कामत हांचे मोलादीक सहकार्य मेळ्ळे असो उल्लेख कोरगांवकार हांणी केला. खरें म्हणल्यार देवळाचें काम 2020 वर्साच सुरू जावपाचें आशिल्लें, पूण कोविड महामारी आनी तंत्रीक कारणांक लागून ह्या कामाक कळाव जालो. आतां हें काम बेगीन करपा खातीर 28 फेब्रुवारीक सांजेच्या 5:30 वरांचेर आकेच्या कोस्ता फॅक्टरी लागसार कूपन येवजणेची कार्यावळ जातली.
कूपन येवजणे विशीं सचीव दीपक गडेकार हांणी सांगलें, 500 रुपयाची 1.5 लाख कूपना उपलब्ध आसतली. हे येवजणेच्या पयल्या जैतिवंताक मडगांवांत ‘2-बीएचके फ्लॅट’ आनी 33 लाख रुपया रोख इनाम दितले. दुसरें सुवातेर ‘महिंद्रा बीई कार’ आनी 9 लाख रुपया जाल्यार तिसरें सुवातेर ‘थार एलएक्स’ आनी 6.25 लाख रुपया आकर्शक इनामां दितले. हीं इनामां वट्ट 3.86 कोटी रुपयांची आसात. तातूंत फ्लॅटा वांगडाच हेर 15 कारींचो आस्पाव आसा. भक्तांनी हे देणगी कूपन येवजणेंत वांटो घेवन देवूळ बांदपाक मजत करची असो उलो मंडळान केला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
