भांगरभूंय | प्रतिनिधी
भाजपान तेंको दिल्ले वेर्लेकार हारले
मडगांव : आकें-बायशचे सरपंच फ्लोरियानो फर्नांडीस जिल्लो पंचायत वांगडी जाले उपरांत प्रभाग नंबर ६ची सुवात रिती आशिल्ली. ते खातीर जाल्ले पोटवेंचणुकेंत आंतानिओ वाझ जैतिवंत जाले. जाल्यार भाजपा वतीन पोटवेंचणुकेंत देंविल्ले प्रदीप वेर्लेकार हांकां अपेसाक तोंड दिवचें पडलें.
आकें, बायशच्या प्रभाग नंबर स खातीर आयतारा पोटवेंचणूक जाली. आके बायशचे सरपंच आशिल्ले फ्लोरियानो फर्नांडीस हांणी जिल्लो पंचायतीची वेंचणूक कॉंग्रेसीचे तिकेटीचेर लढोवन भाजपाच्या उमेदवाराक हारोवन जैत मेळयलें. तांचे पंचायतींत रिते आशिल्ले सुवाते खातीर पोटवेंचणूक जाली.
प्रभाग नंबर ६त वट्ट ६०५ मतदार आसात. तांतले ९८ दादले आनी १०२ बायलो अशीं मेळून वट्ट २०० मतदारांनी मतदान केलें. हांगा ३३ टक्के मतदान जालें. हे पोटवेंचणुकेंत आंतानिओ वाझ हांकां जिल्लो पंचायत वांगडी फ्लोरियानो फर्नांडीस हांचे सयत सिद्धेश भगत आनी हेरांनी तेंको दिलो. जाल्यार प्रदीप वेर्लेकार हे तांचे आड उबे आशिल्ले आनी तांकां भाजपान फाटबळ दिल्लें. आमदार उल्हास तुयेंकर हे मतदान केंद्रा कडेन स्वता हाजीर राविल्ले.
हे वेंचणुकेंत सासश्टीचे मामलेदार गौरव गांवकार हांणी वेंचणूक अधिकारी म्हणून काम पळयलें. मतमेजणी उपरांत प्रदीप वेर्लेकार हांकां ६५, जाल्यार आंतानिओ वाझ हांकां १३२ मतां मेळ्ळीं. जाल्यार ३ मतां अवैध थारलीं. हाका लागून वाझ हे ६७ मतांनी जिखले. जैता उपरांत जिल्लो पंचायत वांगडी फ्लोरियानो फर्नांडीस आनी सिध्देश भगत हांणी उमेद उक्तायली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
