भांगरभूंय | प्रतिनिधी
मडगांव : आकें-बांयश पंचायतीच्या वाठारांत बेवारशी सुण्यांचो प्रस्न गंभीर जाला. हाचेर ग्रामसभेंत नागरिकांनी समस्या मांडून एजन्सी नेमपाची मागणी केली. सरपंच फ्लोरिन्हो फर्नांडीस हांणी एजन्सी कडेन कबलात करपाची प्रक्रिया सुरु आसा. उपरांत लसीकरण आनी हेर गजाली करतले, अशें स्पश्ट केलें.
ग्रामसभे वेळार बेवारशी सुण्यांचो थळाव्यांक त्रास जाता अशें सगल्यांनी सांगलें. गांवांत, शाळेंत वचपी भुरग्यांक, जाण्ट्यांक तशेंच गाडयांच्या फाटल्यान धांवत सुण्यांनी चाबपाचे प्रकार घडटात. कांय जाणां सुण्यांक जेवण घालतात, म्हणून असले प्रकार वाडटात, अशेंय मत थोड्यांनी मांडलें.
सुण्यांचे वाडिल्ले त्रास उणे जावपा खातीर उपाय काडपाची मागणी केली. हाचेर सरपंच फ्लोरिन्हो फर्नांडीस हांणी सांगलें, गोवा ऍनिमल वेल्फेअर ट्रस्ट हे एजन्सी कडेन चर्चा जाल्या. तांचे कडेन कबलात जाले उपरांत वासीन दिवप आनी हेर उपाय करतले अशें तांणी स्पश्ट केलें.
हे ग्रामसभेंत पंचायतीचो जमाखर्च मांडून मंजुरी घेतली. तशेंच कोयराचो प्रस्नूय र्चेक आयलो. बिराडाक रावपी लोक कोयर उक्त्यार उडयतात अशेंय सांगलें. पंचायत कोयर संकलन करता. बिराडाक रावप्यांची वळेरी तयार करून सगल्यांनी सक्तीन कोयर संकलन करप्यां कडेन कोयर दिवपाक सांगतले, अशेंय पंचायती वतीन स्पश्ट केलें. तशेंच कोयर उडोवपी ब्लॅक स्पॉटचे सुवातेर पंचायतीन सीसीटीव्ही लावचे, अशी मागणीय केली.
मजगतीं, गांवांत रावपी घरांत प्रयोगशाळा चलयतात, ताका पंचायतीन ना हरकत दाखलो कसो दिलो, अशी विचारलें. पंचायत वांगड्यांचे बसकेंत हाचेर चर्चा करुन ना हरकत दाखलो रद्द करतले अशें सरपंच फर्नांडीस हांणी स्पश्ट केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
