भांगरभूंय | प्रतिनिधी
पणजी: गोंयच्या आकाश फुलकार हाणें तेलंगणांतल्या हैदराबादाक जाल्ले २१ वे मास्टर्स नॅशनल स्विमींग सर्तींत कांस्य पदक मेळयलें. दृष्टी लायफसेविंगान इन्स्ट्रक्टर पदार आशिल्ल्या आकाशान हें पदक ५० मिटर फ्रिस्टायल सर्तींत मेळयलें. तेलंगण जलतरण संघटणेन हे सर्तीचें आयोजन भारतीय जलतरण महासंघाच्या फुडारपणा खाला केलें. ५० मिटर फ्रिस्टायल सर्तींत केरळचो मुहम्मद हसन हाका भांगरा पदक, जाल्यार कर्नाटकाच्या जी. एन. श्रीरंगाक रुप्या पदक फावो जालें.
आकाश फुलकार हाचे विशीं
आकाश फुलकार हाचो जल्म ९ ऑक्टोबर १९९५ दिसा जालो. पणजेच्या हेडगेवार विद्यालयांत ताणें शिक्षण घेतलें आनी गोवा कॉलेज ऑफ इंजिनीअरिंगात शिक्षण घेवन २०१३-१४ ह्या शिक्षणीक वर्सा ‘ए-ग्रेड’ (७०.३१ टक्के गुण) मेळोवन मॅकानिकल इंजिनियरिंगांत बी.ई. पदवी मेळयली. जलतरणा वांगडाच बॉक्सिंग, वॉटर पोलो, क्रॉस कंट्री, खो-खो आनी अॅथलेटिक्स असल्या खेळांत कुशळटाय सिद्ध करून ताणें इनामांय मेळयल्यांत. म्हापश्यां ऑक्टोबर २०२१ वर्सा जाल्ल्या अ. गों. बॉक्सिंग चॅम्पियनशीप सर्तींत तांणी प्रवीण शिरोडकार हांचें मार्गदर्शन घेवन जैत मेळयलें. आकाशान आतां मेरेन राष्ट्रीय पांवड्यार आठ स्विमींग सर्तींनी, दोन वॉटर पोलो (कॅप्टन) सर्तींत आनी एका खो-खो सर्तींत गोंयचें प्रतिनिधित्व केल्लें. पिरायेच्या इकराव्या वर्सा मुरगांव बंदर ते पणजी जेटी हें पंधरा किलोमीटर अंतर ताणें पेंवन विक्रम प्रस्थापित केलो.
आतां मेरेन ताका तिनशें परस चड मॅडल्स आनी तीस ट्रॉफी मेळयल्या. बंगळुराक अठराव्या राष्ट्रीय फूल लायफ सेविंग चॅम्पियनशीप २०२३ त पांचाचीं पांचूय भांगरा पदकां घेवन मास्टर्स विभागांत वैयक्तीक पद मेळयलें. गोवा अभियांत्रिकी (इंजिनीअरिंग) कॉलेजीन शिक्षण घेतना तांणी त्या महाविद्यालयाचो उत्कृश्ठ खेळगडो म्हणून पुरस्कार मिळयिल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
