आकाशा मुखार लखनौची दिमी

भांगरभूंय | प्रतिनिधी

मुंबय इंडियन्सान झणझणीत जैत जोडून इंडियन प्रिमीयर लिगेचे (आयपीएल) क्वॉलिफायर दोनांत सुवात मेळयली. अहमदाबादाच्या नरेंद्र मोदी स्टेडियमाचेर मुंबय इंडियन्स आतां येजमान गुजरात टायटन्सा आड खेळटलो.

मुंबय इंडियन्सान हांगाच्या चेपॉक मैदानाचेर जाल्ले अॅलिमिनेटर मॅचींत लखनौ सुपर जायण्ट्साक 81 धांवड्यांनी हारयलो. आकाश मढवालान जबरदस्त बॉलिंग करतना पांच धांवड्यो दिवन पांच विकेटी घेतल्यो. ताचे एके ओव्हरींत मॅच मुंबय वटेन घुंवली. लखनौचे बॅट्समन उपरांत गोंदळांत पडले आनी तीग जाण धांवबाद जाले. अॅलिमिनेटरांत पांच विकेटी घेवपी आकाश पयलोच बॉलर थारलो.

183 धांवड्यांचो फाटलाव करतना कायल मायर्स (18) आनी प्रेरक मंकड (3) रोखडेच बाद जाले. मार्कस स्टॉयनीसान लखनौ सुपर जायण्ट्साचो डाव सांबाळपाचो यत्न केलो. पूण, दुसरे वटेच्यान ताका साथ दिवपी एकलोय नाशिल्लो. मुखेली कृणाल पांड्यान (8) लेगीत ताकतीक केली आनी विकेट वगडायली. आकाश मढवालान 10वे ओव्हरींत आयुष बदोनीची (1) विकेट घेतली आनी फुडल्या बॉलाचेर निकोलस पुरनाक खातें लेगीत उगडपाक दिलें ना. दुसरी धांवडी घेतना स्टॉयनीस आनी दीपक हुडा हांची टक्कर जाली आनी ते मेरेन टीम डॅव्हिडान विकेटकीपर इशान किशना कडेन बॉल दिवन लखनौच्या बॅट्समनाक बाद केलो. स्टॉयनीसान 27 बॉलांनी 40 धांवड्यो केल्यो.

फुडले ओव्हरींत कृष्णप्पा गौथम (2) लेगीत धांवबाद जाल्ल्यान लखनौची स्थिती 7 बाद 92 अशी जाली. मढवालान मॅचींतली आपली चवथी विकेट घेतना रवी बिश्नोईक बाद केलो. दीपक हुडा लेगीत धांवबाद जावन तंबूंत परतलो. आकाशान 3.3 ओव्हरींनी पांच धांवड्यो दिवन पांच विकेटी घेतल्यो. लखनौचो डाव 101चेर सोंपलो.

ते आदीं मुखेली रोहित शर्मा (11) आनी इशान किशन (15) रोखडेच बाद जाल्ल्यान मुंबयची अवस्था 2 बाद 38 अशी जाली. फाटले मॅचींत शेंकडो मारपी कॅमेरून ग्रीन (41) आनी सुर्यकुमार यादव (33) हांणी 38 बॉलांनी 66 धांवड्यांची भागिदारी केली. तिलक वर्मा आनी टीम डॅव्हिड (13) हांणी मुंबय इंडियन्साची पडझड थांबयली. दोगांयनी 43 धांवड्यांची भागिदारी केली. 18वे ओव्हरींत नवीनान आनीक एक धपको दितना तिलकाक (26) बाद केलो. नवीनान चार ओव्हरींनी 38 धांवड्यो दिवन चार विकेटी घेतल्यो. नेहालान 12 बॉलांनी 23 धांवड्यो करून मुंबयक 8 बाद 182 धांवड्यां मेरेन पावयलो.