आकांत गुन्यांवांचो, आव्हान सुरक्षातायेचें

भांगरभूंय | प्रतिनिधी

पुलीस सेवेंत पुलिसांची जी फौज आसा ताचो आंकडो पळयल्यार चोरयो, दरोडे बंद करप व्हडलें कुस्तार न्हयच. पूण ते खातीर पुलिसांक रस्त्यार रावचें पडटलें.

गोंयांत गुन्यांव वाडपाक लागल्यात. ताचीं कारणां मागीर वेगवेगळीं आसूं येता. पूण हे गुन्यांव नियंत्रणांत हाडपाक आनी बंद करपाक ताचेर कसलोच उपाय जायना हें गोंयचे अस्मितायेक, शांतीतायेक आनी संस्कृतायेक धोक्याचें थारलां. हें लक्ष्य सादपा खातीर सामान्य मनीस पुलिसेक मदत करपाक शकता, पूण ते खातीर तांचें आयकून घेवन कारवाय करपी पुलीस अधिकाऱ्यांची गरज आसा. निमाणें कारवाय करपाचो अधिकार हो पुलिसांक आनी सरकाराक आसता. 

खंयचोय गुन्यांव करून जामिनाचेर सुटिल्ल्या गुन्यांवकारांचेर पुलिसांचें लक्ष आसता काय? हो प्रस्न खूब कितें उजवाडाक हाडपाक शकता. पूण सामान्य मनशान असो प्रस्न केलो वा सुदारपा खातीर टिका केली जाल्यार ताचेरच गुन्यांव नोंद जायत अशे भिरांतेन जगपा सारकी परिस्थिती निर्माण जावंक फावना. खंयच्याय प्रकरणा वेल्यान पुलिसांक इेमेल केली जाल्यार ताचो प्रतिसाद लेगीत पुलिसां कडल्यान येना ही अवतिकाय. इतलेंच न्हय तर तांचीं सुसेगादपणां आनी अकुशळटाय हातूंतल्यान दिश्टी पडटा.  

हालींच्या सात म्हयन्यांत गोंयांत तीन दरोडे पडले. पयलीं दोनापावला जंय ज्येश्ट नागरिकांक बंदिस्त करून तांच्यो वस्ती आनी पयशे चोरून व्हेले. ह्या बंगल्यांत सुरक्षा रक्षक आसून लेगीत ताका मार-बडय करून दरोडेखोर भितर सरले आनी तांणी आपलें लक्ष्य पुराय केलें. हो बंगलो प्रतिश्टीत घराण्याचो आशिल्ल्यान ताची चर्चा खूब जाली आनी गोंय पुलीस कशे तरेन नापास जाले ताचेर सोशल मिडियाचेर तर चर्चा रंगली. 

इतलें सगळें जावन आमच्या पुलिसांचे वागणुकेंत कांयच बदल जालो ना. तांणी सदचे भशेनूच रातचें पॅट्रोलिंग, नाकाबंदी सदळूच करून दवरली आनी कांय म्हयन्यां उपरांत गणेशपुरी म्हापश्यां एका दोतोराच्या घरांत दरोडो पडलो. ह्या दरोड्या वेळार दरोडेखोरांनी घरच्या वांगड्यांक बांदून घालून दोतोराच्या जाण्टे पिरायेच्या आवयक च्या करून दिवपा खातीरय धमकायली. ही सगळी घडणूक रातची 3 ते 5 वरां मजगतीं जाल्या आसतली. इतले रातीं दरोडो घालून आनी च्या करून घेवन ती पिवप म्हणल्यार ह्या दरोड्याखोरांक कोणाचोच भंय ना हें समजता. दरोडो घालून वतकच लेगीत वाटेर तांकां कोणूच आडावचो ना हाचोय विस्वास तांकां आशिल्लो आसूं येता, कित्याक तर गोंयचे पुलीस रातच्या वेळार रस्त्यांचेर दिसनात. नाकाबंदी आसना आनी पॅट्रोलिंगूय जायना हाची तांणी खबर काडिल्ली आसुंये. नाजाल्यार इतलो विस्वास खंयच्यान येतलो? 

अजाप म्हणल्यार हे दोनूय दरोडे पडून दुसऱ्या दिसाच्यान थोड्याच दिसां खातीर पुलिसांनी नाकाबंदी सुरू केली आनी रोखडीच बंदूय केली. रातीं दरोडो घालून गेल्ले दरोडेखोर दुसऱ्या दिसा सांजे मेरेन गोंयांत रावतले? आनीक रावले जाल्यार नाकाबंदीक सांपडटले? ते इतले पिशे आसतले व्हय? ना! देखुनूच दरोडेखोरांक मदत करपी लेगीत बरेच उसरा सांपडले. आनीक जे सांपडल्यात ते खरेंच ह्या गुन्यांवा फाटल्यान आसात काय लोकलजे खातीर कोणाकूय धरून हाडल्यात हाचो पत्तो लागप कुस्तार. 

बरें! इतलें सगळें जावन लेगीत आमचे गोंयचे पुलीस सतर्क जालेनात. आनी हेच खातीर फाटल्या सप्तकांत बायणा वास्को आनीक एक दरोडो पडलो. हे खेपेक दरोडेखोरांनी ह्या घरांतल्या वांगड्यांक वार्रांवांनी मारले. जाण्टे आवयक धुकळ्ळी आनी घरांतल्या हेर महिलांकय बडयलीं. इतलें धाडस ह्या दरोडेखोरांक आयलें खंयच्यान? कायदो आनी सुवेवस्था कोसळ्ळ्या, थंयच्यान? ही केस आमी आव्हान कशी घेतल्या अशें म्हणपी पुलिसांच्या म्हणण्याचेर रडचें काय हांसचें तेंच कळना, कित्याक तर हालीं तेंपार अशे कितलेशेच तरेचीं आव्हानां तांच्या मुखार उबीं रावल्यांत आनी पुलीस तातूंत नपास जाल्यात. तातूंत हें नवें आव्हान तांकां पुरायपणान येस दितलें? 

बायणाचे हे घडणुकेन दरेक गोंयकाराची न्हीद उडयल्या. घरांत मनशां आसतना, जनेलांचे ग्रिल्स कांपून भितर सरपी दरोडेखोर केन्नाय कोणाच्याय घरांत भितर सरपाक शकतात आनी येवन बडोवपाक शकतात हो भंय गोंयकारां मदीं उरतलो. बायणा जाच्या घरांत हो दरोडो पडलो ताच्या आनी ताच्या फामिलीचेर ह्या दरोड्याचो इतलो परिणाम जाला की तीं त्या घरांत भितर सरपाक भिवपाक लागल्यांत. कित्याक तर तांच्या वांगडा दरोडेखोरांनी जो आतंक केला तो तांणी पळयला. 

दरोडेखोरांचो हो आतंक बंद करपाक गोंय पुलीस नपास थारल्यात. दरोडो पडटकच नाकाबंदी सुरू करप, पुलिसांच्यो बदल्यो करप ह्या अशा ‘नाटकांनी’ गुन्यांव उणे जावचे नात. गुन्यांव उणे जातले जाल्यार पुलिसांनी सेवेंत रुजू जातना जो सोपूत घेतिल्लो तो पाळचो पडटलो. दुदैवान आमचे पुलीस सेवेंत अशेय पुलीस आसात जांची मानसिकताय गुन्यांवकारांक, कैद्यांक बंदखणींतल्यान सोडपाची आसा. चोरांचो हात धरून तांकां चोरपाक लावपी पुलीस हे यंत्रणेंत आसले जाल्यार गुन्यांव कशे पयस जातले? गुन्यांव पयस करपाचे सोडून जर गुन्यांव वाडोवपाक कोणूय मदत करता जाल्यार ताचेर कारवाय जावंक जाय. अशा व्यक्तींक लोकांच्या दोळ्यांक उदक लावपाक तात्पुरते निलंबीत करून परत पुलीस सेवेंत घेवप ही एक व्हड चूक. 

दरोडेखोर रातचे वार्रांव, शस्त्रां घेवन भोंवतात आनी आमच्या पुलिसांच्या ते नदरेक येनात हें चितल्यारच आमी कितले सुरक्षीत आसात हें कळटा. बऱ्याच वर्सा फाटीं पणजे राजधानींत चोराचो फाटलाव करतना एका पुलीस उप निरिक्षकाक (चोरान) चाकू तोपिल्लो. ताणें लोकांच्या रक्षणा खातीर, चोरयो आडपा खातीर आनी चोराक ख्यास्त दिवपा खातीर आपली ड्युटी केली. अशा कुशळ आनी भ्रश्टाचाराचो दाग नाशिल्ल्या पुलिसांक सलाम. गुन्यांव आडावपाक अशे पुलीस जाय. अशाय पुलिसांची फौज पुलीस सेवेंत आसतलीच, जे प्रामाणीक आसतले. फकत तांकां सेवेची संद मेळना काय वा दिनात हें खबर ना. 

पुलीस सेवेंत पुलिसांची जी फौज आसा ताचो आंकडो पळयल्यार चोरयो, दरोडे बंद करप व्हडलें कुस्तार न्हयच. पूण ते खातीर पुलिसांक रस्त्यार रावचे पडटले. गस्त घालतना कसल्याच हांयसांक बळी पडनासतना आपलें काम करचें पडटलें. सुर्य उदेतना जो वांटो घालतात ताचेर आळो हाडचो पडटलो. पूण ‘सिस्टमी’ भितर आशिल्ले अधिकारी हें करपाक शकचे नात. ते खातीर लोकांचे रक्षण करपा खातीर घेतिल्लो सोपूत पाळपी पुलीस जाय पडटले. सिस्टमी भायर आशिल्ले अशे पुलीस सोदून काडून तांकां तांचें काम करपाक दिवपाची संद दिवची पडटली. नाजाल्यार पुलीस कोण आनी दरोडेखोर कोण हें वळखुवप हे मुखार खूब कुस्तार जातलें.

समीर नायक

मडगांव