भांगरभूंय | प्रतिनिधी
पणजीः तंत्रज्ञान हो अंदूंच्या भारतीय आंतरराष्ट्रीय चित्रपट महोत्सवांतलो (इफ्फी) नवो उपक्रम. केंद्रीय म्हायती आनी प्रसारण मंत्रालयान आयोजीत केल्लें ‘स्वातंत्र्य चळवळ आनी सिनेमा’ हो विभाग सिनेमोगींक आपले वटेन चड आकर्शीत करता.
कांपाल फुटबॉल मैदानाचेर मल्टीमिडिया डिजिटल प्रदर्शनाचें उक्तावण सोमारा केंद्रीय म्हायती आनी प्रसारण मंत्री अनुराग सिंग ठाकूर हांणी केलें. तंत्रज्ञानाच्या साबार नवनिर्मणीचो उपेग करून भारताच्या स्वातंत्र्य संघर्शाची काणी ह्या प्रदर्शनांत सांगल्या, अशें मंत्री ठाकूर हांणी सांगलें. ह्या विभागाक भेट दिवपी रसिकांक चड करून विद्यार्थ्यां खातीर आमच्या उर्बादिण्या फुडारा विशीं म्हायती मेळपाक शकता. विद्यार्थ्यां खातीर एक प्रेरणा थारपाक शकता, अशेंय तांणी सांगलें.
आझादी का अमृत महोत्सव ह्या सर्वव्यापी विशयांतल्यान सीबीसी पंगडाची कल्पना प्रदर्शनांत कॅमेरा- लॅन्सीच्या रुपांत पळोवपाक मेळटा. प्रदर्शन हॉलांत भितर सरतना 12×10 फूट व्हड एलईडी स्र्कीनीचेर वसणूकवादी सत्ते आड वेगवेगळ्या स्वातंत्र्य झुजाऱ्यांच्या जिविताची आनी योगदानाची म्हायती दिवपी ‘स्वराज’ हे लोकप्रीय दूरदर्शन माळेचीं खीणचित्रां दाखयतात.
1857 तल्या स्वातंत्र्य झुजाचो आस्पाव आशिल्ले स्वातंत्र्य चळवळींतले दुर्मीळ फुटेज प्रदर्शनांत पळोवपाक मेळटा. तातूंत राजा राम मोहन रॉय, नेताजी सुभाष चंद्र बोस, काला पानी, भगतसिंह आनी चंद्रशेखर आझाद हांचो आस्पाव आसा.
डिजिटल क्लीप बुकांत भारतीय स्वातंर्य संघर्शाचो काळा प्रमाण प्रवास सीबीसीन क्युरेट केल्ल्या पोस्टराच्या रुपांत दाखयला. स्वातंत्र्य संघर्शाचो आवाज जाल्लीं गितां आयकुपाक मेळटात. तेचवरीं सावंड शावरांतल्यान भारतीय स्वातंत्र्य फुडाऱ्यांचें भाशण आयकुपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
