आऊ लोलीता! नंदू सबका बंधू: शक्ती कपूर

भांगरभूंय | प्रतिनिधी

अशे तरेन एक सादो गाडयेचो अपघात सुनील कपूराक1980 वर्सा प्रदर्शीत जाल्ल्या फिरोजखानाच्या ‘कुर्बानी ’ ह्या सुपरहिट फिल्मांत खलनायकाचो रोल मेळ्ळो.

हिंदी सिनेमांत दरेक पात्र आपल्या अभिनयांतल्यान जिवें करून केन्ना क्रायम मास्टर गोगोचे भुमिके वरवीं प्रेक्षकांक  भियोवपी आनी राजा बाबु सिनेमांत ‘नंदू सबका बंधू सारके’ विनोदी टायमिंगाचें संवाद म्हणत हांसोवपी कलाकार सुनील सिकंदरलाल कपूर हाचो जल्म 3 सप्टेंबर 1952 दिसा दिल्लींत मध्यमवर्गीय परिवारांत जाल्लो. बापूय सिकंदरलाल वेवसायन शिंपी. आवय घर सांबाळपी. बापायलें दिल्लीच्या कॅनॉट प्लेसांत कपडे तयार करपाची ल्हानशी फॅक्टरी आशिल्ली. शिक्षण पुराय करून पुतान दुकान हातांत घेवचें अशें बापायक दिसतालें. सुनीलाचें सुरवातीचें शिक्षण नवी दिल्लींत जालें. भुरगेपणांतल्या उचापती सभावाक लागून सुनील कपूराक शारांतल्या तीन वेगवेगळ्या शाळांनी शिकचें पडलें. ताका खेळां विशीं, खास करून क्रिकेटीची आवड आशिल्ली. राज्य पांवड्या मेरेन तो क्रिकेट खेळ्ळो आनी खेळां कोट्यातल्यान किरोडीमल कॉलेजींत ताका प्रवेश मेळ्ळो. 

कॉलेजींत आसतनाच तो अभिनया कडेन आकर्शित जाल्लो आनी पदवी मेळयले उपरांत ताणें नायक जावपाचें सपन साकार करपाचो निश्चेव केलो. बापायले इत्से प्रमाण ताका दुकानांत बसपाची इत्सा नाशिल्ली. ताका टूर अॅण्ड ट्रॅव्हल्साचो वेवसाय करपांत रस आशिल्लो. बापाय कडेन खूबदां वाद जातालो. ही गजाल ताणें इश्टांकूय सांगिल्ली. त्या वेळार तागेले कांय इश्ट पुणेंच्या फिल्म अँड टेलेव्हिजन इन्स्टिटयूट ऑफ इंडिया (FTII) प्रवेश घेवपाक फॉर्म भरताले. तांणी  सुनिलाक विचारीनासतना तागेलोय अर्ज भरलो. शक्तीक फॉर्म भरतकूच कांय दिसांनी घरा एक पत्र आयलें, ताका एफटीआयआयचे लेखी परिक्षे खातीर दिल्ली येवपाक सांगिल्लें. सुरवेक ताका अजाप जालें की हें कशें जालें. इश्टांक विचारतकच तांणी ताका सगळें सांगलें आनी चांचणे खातीर वांगडा येवपाक सांगलें. चांचणे उपरांत ताका ऑडिशनाक आपयलो. तें घेवपाक म्हालगडो अभिनेतो अशोक कुमार (दादा मुनी), अभिनेत्री कामिनी कौशल आनी दिग्दर्शक हृषिकेश मुखर्जी आसले. पयलीं ताणें सगल्यांच्या पांयांक हात लावन आशिर्वाद घेतलो. दिग्गज कलाकारांक मेळपाची संद मेळ्ळी म्हूण तो खूब खोशी जालोच, पूण तांचे सामकार दाळ शिजची ना हाची ताका मनांतल्यान भिरांत आशिल्ली. ऑडीशन दिलें. देशभरांतल्यान सुमार 48 हजार उमेदवारांनी तें दिल्लें. तांतूंतले फकत 10  वेंचून आयले. ताचें मदीं अनिल धवन, नसिरुद्दीन शाह आनी सुनिल कपूर हे तीन तरणाटे दिल्ली केंद्रांतले आशिल्ले. सुनीलाची निवड जाल्ली आयकून तागेले इश्ट अजापित जाले. घडये ताणें पयशे दिल्या, अशें तांकां दिसलें. 

फुडें सुनील कपूर पुण्याक स्क्रीन टेस्ट चांचणेतूय पास जालो. ताका दिल्ली सावन पुण्यां मेरेन  रेल्वेंतल्या प्रवास करतना गाडयेंत एफटीटीआयंत प्रवेश घेवपाक वचपी एक मनीस मेळ्ळो. दोगांयचीय बरी इश्टागत जाली. कोर्स सुरू जावचे पयलींच्या काळांत तो इश्टाच्या लग्न सुवाळ्याक हाजीर रावपाक मुंबय वतालो. ताचे वांगडा सुनील कपूरूय गेलो.

हें लग्न अभिनेतो विनोद खन्नाचो भाव प्रमोद खन्ना हाचें आशिल्लें. राकेश रोशना सयत जायते बॉलिवूड सेलिब्रिटी हाजीर आशिल्ले. तांकां पळोवन सुनील कपूराकय आपुणूय फिल्मी स्टार आसपाचो फील आयलो. डीडी उर्दूक दिल्ले मुलाखतींत सुनील कपूरान सांगिल्लें की पुणें इन्स्टिट्यूटांत पावलो तेन्ना ताच्या हातांत बियर आशिल्ली आनी तो  सिने स्टार जालां अशें समजतालो. हॉस्टेलांत पावतकच ताचे सामकार आशिल्या राकेश रोशनाच्या पांयांक हात लावन आशिर्वादा घेतलो. 

थंयच  बुराक पडिल्ली पॅण्ट घालून रंगान काळो, पूण आंगलोटान धडधाकट असो एक तरणाटो आशिल्लो. ताणें त्या तरणाट्याक बियर पितलो काय विचारलें, पूण ताणें इन्स्टिट्यूटांत सोरो पियेवपाक मनाय आसा अशें सांगून न्हयकार दिलो. म्हजें नांव मिथुन चक्रवर्ती अशें ताणें सांगलें. मागीर सुनिलाक हॉस्टेलाच्या रूमांत व्हेलो, थंय कांय सिनियर पयलींच हाजीर आशिल्ले. तांणी ताचें रॅगींग केलें. केंस कापले आनी स्विमिंग पुला भोंवतणी धांवपाक लेगीत लायलें. तेन्ना ताका भिरांत दिसली. पश्चातापान तो रडपाक लागलो आनी ताका परतून  दिल्लीक वच्चें अशें दिसलें. म्हाका नट जावपाची इत्सा ना. माफ करात अशी विनवणी केली, तेन्ना मात मिथुन चक्रवर्तीन वरिश्ठांक समजावन रॅगींग थांबयलें. पुण्यांक शिकतना एक दीस दिग्दर्शक अर्जुन हिंगोरानी वर्ग घेवपाक आयलो. ताणें आपल्या ‘खेल खिलाडी का’ ह्या सिनेमांत ताका भुमिका दिवपाची पेशकश केली. सुनील कपूरान ही ऑफर स्विकारली आनी हांगाच्यान तागेल्या अभिनय कारकिर्दीची सुरवात जाली. थोड्याच काळा उपरांत तो एफटीआयआयंतलें शिक्षण पुराय करून मुंबय गेलो.

 सुरवेक सांताक्रूझ वाठारांत पेईंग गेस्ट म्हूण रावतालो. हें विनोद खन्नाक कळटकूच ताणें  ताका फोन करुन तागेल्या बंगल्यांत रावपाक येवंक सांगलें. उपरांत तो विनोद खन्नाच्या बंगल्यांत सुमार चार वर्सां रावलो. ह्या काळांत ताणें मॉडेलिंग उद्देगांत आपली सुवात निर्माण केली. सुनील कपूर हो डॅनी डेन्झोंगपा आनी रणजीत हांचो व्हडलो फॅन आशिल्लो. खासा करून रणजीतान सुनील कपूराक “दरवाजा” सिनेमांत भूमिका मेळोवन दिवंक आदार केल्लो. दोघांनीय ह्या उद्देगांत सुवात मेळोवपा खातीर खर संघर्श केल्लो. मॉडेलिंग करतना सुनील कपूरान ह्याच नांवान सुमार पंधरा सिनेमांत मुखेल नायकाचें काम केल्लें. सिनेमा चड चल्लेच नात. मॉडेलिंग करुन जोडिल्ल्या पयशांनी सुनील कपूरान 1961 सेकंडहॅंड फिएट गाडी घेतली. गाडी चित्रीकरणाचे थळार वचपाक वापरतालो. एक दीस गाडयेन रस्त्यार नव्या करकरीत मर्सिडीज गाडयेक फाटल्यान धपको मारलो. अपघाता उपरांत सुनील कपूर रागान तांबडो गुंज जावन तावांतावान झगडपाच्या हेतान गाडयेंतल्यान भायर आयलो. दुसरे वटेन  मर्सिडीज गाडयेचो धनी आपल्या गाडयेंतल्यान देंवलो. कारण तागेल्या नवे गाडयेचें चड लुकसाण जाल्लें. गाडयेचो धनी फिरोज खानाक पळेवनच सुनील अपघात विसरलो आनी फिरोज खानाक, ‘सर, हांव एफटीआयआय थावन अभिनय शिकून आयलां. म्हजें नांव सुनील कपूर. म्हाका तुमचे वांगडा काम करपाचें आसा. तुमच्या फिल्मांत म्हाका एक भुमिका दियात’ अशी विनवणी केली.

तो मेरेन थंय गर्दी जमिल्ली. देखून, फिरोज खान एक उतर उलोवंक ना आनी शांतपणान थंयच्यान गेलो. 

पूण सुनील कपूरालें तपकीरी दोळे ताचे नदरेंत भरिल्ले. ऑफिसांत पावतकच फिरोज खानान के. शुक्लाक ह्या अपघाता विशीं आनी त्या तरणाट्याचे खुनशी दोळ्यां विशींचें वर्णन सांगून ताका ‘कुर्बानी’ सिनेमांत रोल दिवपाची इत्सा उक्तायली. सांजवेळार सुनील इश्ट के. के.शुक्ला हाच्या घरा गेलो. शुक्लाचे घरकान्नीक सुनील आपली भयण मानतालो, देखून तांची वळख आशिल्ली.

के. के.शुक्लान म्हणलें, “हांव तुका एका सिनेमांत भुमिका दिवपाचो आशिल्लो, पूण ते भूमिके खातीर आतां फिरोज अपघात जाल्ले गाडयेंतल्यान रागान भायर सरपी त्या तपकिरी दोळ्यांच्या तरनाट्याक सोदता. कारण फिरोजाले नदरेंत ताच्या मुखामळा वयली आनी दोळ्यांत एक खाशेली खलनायकी तीव्रता भरल्या. हे आयकून सुनीलान खोशयेन आड्डून सांगलें, हांवूच तो जाका लागून आयज फिरोज खानाचे गाडयेक अपघात जालो. शुक्लान रोखडोच फिरोज खानाक फोन करून ताका सुनील कपूराची गजाल सांगली. अशे तरेन एक सादो गाडयेचो अपघात सुनील कपूराक1980 वर्सा प्रदर्शीत जाल्ल्या फिरोजखानाच्या ‘कुर्बानी ’ ह्या सुपरहिट फिल्मांत खलनायकाचो रोल मेळ्ळो.

उपरांत कच्चे हीरे, जानबाज, दो वक्त की रोटी ह्या सारक्या जायत्या चित्रपटांनी दोगांयनी एकठांय काम केलें. शक्तीचें खरे नांव सुनील कपूर आनी सुरवातेच्या चित्रपटांत तो खऱ्या नांवान काम करतालो. कुर्बानींत ताचें नांव बदलून शक्ती कपूर करपी जेष्ठ अभिनेतो सुनील दत्त. खरें म्हणल्यार सुनील दत्त ह्या नांवान आपूण पयलींच फिल्म इंडस्ट्रींत आसा, म्हूण सुनील कपूराच्या कारकिर्दीचेर वायट परिणाम जावंक शकता अशें सुनील दत्ताचें मत आशिल्लें. शक्ती कपूरान पयलेच खेपे सुनील दत्ता वांगडा 1980 वर्सा प्रदर्शीत जाल्ल्या ‘यारी दुष्मनी’ त काम केलें. 1981 वर्सा सुनील दत्त हाचो पूत संजय हाच्या ‘रॉकी’ ह्या पयल्या चित्रपटांतय शक्ती कपूरान खलनायकाची भुमिका केल्ली. कुर्बानी आनी रॉकी ह्या चित्रपटांनी शक्ति कपूराक ट्रॅकाचेर हाडलो आनी फुडाराचो परिपूर्ण खलनायक आकार घेवंक लागलो.

(पयलोवांटो)