भांगरभूंय | प्रतिनिधी
सध्या गोंयांत अनधिकृत घरां, जमीन विक्री हे विशय गाजतात. गोंय तें केदें आनी बोवाळ तो कितलो, अशें भायल्या कोणाकूय दिसूं येता. आतां गोंयांत कितलीशी जमनी उरल्या? तिचें, फ्लॅटांचें मोल कितलें वाडलां? ताची फक्त कल्पना करुं येता. मध्यमवर्गीयाक तेंय जमचें ना. सादो फ्लॅट घेतलो जाल्यार आतां 50 लाख रुपया तरी बोल्सांत जाय. जमनीक बरें मोल आयिल्ल्यान जाण्ट्यांच्यो जमनी लोक धडाधड विकपाक लागल्यात. 5 – 10 कोटी घेवपाचे आनी वण्टीक पांय लावन सुसेगाद न्हिदपाचें. कोट्यांनी रुपया दिवन जमनी घेवपी गोंयकार आसात (गांवगिऱ्या वाठारांनीय!!), पूण तांचे परस भायले पयशेकार चड आसात. हे जमीन विक्रे आड करंदाय सुरू जाल्या. धाडस नाशिल्ले मनांतल्या मनांत रडटात. पूण सगल्यांच्या दोळ्यां मुखार गोंयमायेच्या शालवाचें कपयाळें जातलें अशें दिसपाक लागलां.
गोंयांत लाखांनी घरां अधिकृत करपाक तीन परिपत्रकां जारी जाल्यांत. 1972 आदलीं घरां, जांची नोंद सगल्या सरकारी कागदांचेर जाल्या, तांकां सॅटेलमेंट प्राॅपर्टी म्हूण मानून घेतले. 1 आॅगस्टा उपरांत ह्या कामाक सुरवात जातली. हीं घरां वा बांदकामां नेमकीं कोणाचीं, हातूंत घरां कितलीं आसात? इतलीं वर्सां ताचे कडेन कोणाचेंच लक्ष कशें गेलें ना? सर्वेचेर नात त्या 55- 60 वर्सांच्या बांदकामांचें कितें करतले? लोक प्रस्न उपस्थीत करपाक लागल्यात. घर, दुरीग, पयलो मजलो बांदतना कायदेशीर सोपस्कार करून घेवप हें काम कोणाचें? तो ते प्रामाणीकपणान कित्याक करिना? ताचेर कोणाचें चेपण बी येता? बऱ्याच लोकांक आयज घर बांदतना वा मालमत्ता घेतना कसले दाखले, परवाने लागतात, तें खबर आसना. मागीर कांय वेळार धूर्त कोले तांचो गैरफायदो घेतात. नकळटां जाल्लें अनधिकृत काम समजूं येता. पूण कांयजाण मुद्दाम वाकडे वाटेन वतात. बरींच अनधिकृत, बेकायदेशीर बांदकामां पसून कायदेशीर जाल्यांत. फुडाराक केन्ना ना केन्ना तें कायदेशीर जातलें, ह्या भावार्थाचेर जगपीय आसात. मागीर अचकीत कोणाचो दोळो त्या जाग्याचेर पडटा आनी तो कायदेशीर मार्गान थंय बुलडोझर चलयता.
कांय आस्थापनांचेर न्यायालयाच्या आदेशा प्रमाण घण बसपाचो आसा. ताचे वयल्यान विधानसभेंत बोवाळ जालो. आतां मंगळारा अनियमीत बांदकामां नियमीत करपा विशींच्या विधेयकाचेर भासाभास जातली. मगोच्या काळांत झुवारी कंपनीक दिल्ले जमनीचे प्लाॅट करून विकपाचें काम चालू आसा, असो आरोप जालो. ह्या प्रकरणाक कोण जापसालदार? कोमुनिदाद? हेर कोमुनिदाद हाचे पसून स्फूर्त घेवंक शकतात? गोंयची जमीन गोंयकारां खातीर उरपाक नाका? भायल्यांनी कितली स्क्वेअर मिटर घेतल्या?
शेतकी जमीन पिका खातीर वापरतात. बरीच पडंग आसा. ही जमीन वा बिगर कृशी उद्देशां खातीर आशिल्ली जमीन विकप तशें कठीण. विकपा सारकी आशिल्ली ती खपली. म्हूण आतां कांय जाण दोंगर विकपाक लागल्यात. बोगस दस्तावेज करून जमीन विकप्यांचेर ईडीन कारवाय सुरू केल्याच. पूण हाचे फाटल्यान व्हडले सुत्रधार आसतले. तांचेर पयलीं कारवाय जावंक नाका? रीण फारीक करपाक, बेरोजगारी, भलायकी खर्च हाका लागून घराब्याची पडंग जमीन लोक विकपाक लागल्यात. थोडे पयश्यां खातीर. सेकंड होम खातीर बऱ्याच अतिगिरेस्तांनी गोंयांत गुंतवणूक केल्या. अजून करतात. थोडे तिचेर वेवसाय करतात, थोडे होम स्टेच्या नांवा खाला घरां बांदतात आनी पर्यटकांक भाड्यान दितात. हें सरकाराक लुकसाण करपी. जमनीचें मोल 1985 उपरांत वाडत गेलें तें आतां दर्यादेगांचेर 20 पटींनी वाडलां. कृशी जमनींचेर फार्म हावसां उबीं जाल्यांत. भायल्यांचे जमीन खरेदीचेर निर्बंध आयले नात जाल्यार गोंयची परोपकारी मानसीकताय, एकवट, संस्कृतीचेर, राजकी- समाजीक मळाचेर परिणाम जावपाची भिरांत आसा. सुरवात जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
