भांगरभूंय | प्रतिनिधी
गर्मेच्या दिसांनी आमचें जीवित आंबो आनी पणसा बगर अर्धकुटेंच दिसता. हीं दोनूय फळां गोंयचे दर एका घरांत आपलो विशेश मोल सांबाळटाच आनी त्याच बरोबर दरेकल्याच्यो आंबो – पणसा कडेन आपल्यो यादी जुळिल्ल्यो आसतात.
आंबो, जाका फळांचो राजा म्हणून वळखतात, गोंयकारा खातीर हें एक फक्त फळ न्हय, तर तांचे भुरगेपणच्यो मोगाळ यादी. गांवगिऱ्या वांठारांनी चडश्या भुरग्यांनी ह्याच आंब्याक लागून मार, तापसाणी खाल्ल्याच आसतल्यो. कारण आमी शाळा सुटली काय घरा येवचे पयलीं सगळे गांवांतले आंबे भोंवत येताले आनी दनपार एकाक सुटलेली शाळा, हे आंबे आमकां घरा पावता मेरेन अडेच – तीन करताले. घरा आई वाट पळयताली आनी तीन जाता मेरेन तिचे पाशियेस पिड्ड्यार जाताले. दिश्टे पडना फुडेंच आईचीं फुला घेवंची पडटालीं, पुण आंबे पळोवन सगळ्यांच्याच मनाक मात्शें बरें दिसतालें. आनी दिसचें ना किद्याक…..? आंबो घरच्या भुरग्यांक धरून जाण्ट्या मेरेन आपली गोडसाण पावयतालो.
पणस म्हणून आंब्या परस किदें फाटीं ना. हे गर्मेचे दीस म्हळ्यार तांची सर्त कशी. दोगी आपले मोल सिद्ध करपाक फाटीं रावनात. पणसाचो तो आगलो वेगळो आकार लोकांक आपल्या फुड्यान आोडून व्हरता. तो दिसता तसो भितरल्यान ना हां …… ताचें रुप मात्शें रागिट दिसता कारण ताका कांटे आसतात न्हय……. पूण भितरल्यान तो खूब मोगाळ आनी गोड.हीं दोनूय फळां गोंयचें दायज कशें. आदीं दोनपारचें जेवण म्हळ्यार आंबो पणसाचे घरे. अशे तरेन ही फळां पयलीं सावन आमाचे कडेन जुळिल्लीं आसात.
सर्वेश मळकर्णेकार
[email protected]
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
