भांगरभूंय | प्रतिनिधी
हवामान बदलाक लागून उसरां येवपी काजवाचें पीक देंवलें
पणजीः अंदूं आब्याचें पीक बरें आसा. पूण काजवाच्या पिकाक मात फटको बसला. आंबे ल्हवू ल्हवू बाजारांत येवपाक लागल्यात आनी एप्रील मेरेन बाजार आंब्यानी भरतले, अशें शेतकी खात्याच्या वरिश्ठ अधिकाऱ्यान सांगलें.
आंब्याचें पीक आतां मेरेन तरी बरें आसा. पूण काजवाचें पीक कमी जावन जे उसरां पीक येता ताका फटको बसला, अशें अधिकाऱ्यान सांगलें.
आंब्याक एकादच चंवर फुट्टा. पूण काजू विशीं तशें ना. काजीक तीन पांवड्यांनी चंवर येता आनी जो निमाणो चंवर येता तांकां हवामान बदलाचो फटको बसला. पयलो चंवर फुटिल्लो तेन्ना पीक बरें आयिल्लें. दुसरो आनी तिसरो चंवर आयलो तेन्ना पीक उणें आयलें, अशीं म्हायती अधिकाऱ्यान दिली.
पूण आंब्याची स्थिती खूब बरी आसा. आमी हालींच वेवसायिकांची बसका घेतिल्ली तांणी पीक बरें आशिल्ल्याची प्रतिक्रिया दिल्या. तशेंच शेतकी खात्यान केल्ले आंब्याचे बागायतीचे पावणेक बरो दर मेळ्ळा. आंबे आतां बाजारांत येवपाक लागल्यात. एप्रील म्हयन्यांत आंब्यांचो हंगाम सुरू जावन व्हड प्रमाणांत आंबे येवपाक सुरवात जातली.
आंब्याचो बागायती रेनाक काडल्यान आनी ज्या लोकांनी ती रेनाक घेतल्यात तांणी अंदूंचे पीक बरें येतलें म्हूण विस्वास उक्तायला. जितली बागायती आमी रेनाक काडल्यात तातूंतल्यान आमकां बरी दर फावो जाल्या. पिकाक अजून मेरेन कसलोच फटको बसूंक ना, देखून फुडाराक व्हड प्रमाणांत पीक तयार जावपाची शक्यताय आसा, अशें अधिकाऱ्यान सांगलें.
आंबे अजून मेरेन व्हड प्रमाणांत लागपाक सुरवात जाल्या. आमी सगल्यो आंब्याच्यो बागायती रेनाक काडल्यात आनी ज्या लोकांनी ती रेनाक घेतल्यात तांणी अंदूंचे पीक बरें येतलें म्हूण विस्वास उक्तायला. शेतकी खात्याच्यो स बागायती आसात. तातूंत कुळें, केरी, म्हापशें, पेडणें, वाळपय आनी, मडगांव ह्यो बागायती रेनाक काडल्यात, अशी म्हायती अधिकाऱ्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
