भांगरभूंय | प्रतिनिधी
आंबेली स्पोर्ट्स क्लबान कुंकळ्ळी युनियनाक सडन डॅथांत 5-4 अशा गोल फरकांनी हारोवन पयले व्हीजेटी करंड फुटबॉल सर्तीचें वस्तादपण जोडलें. चिंचोणेच्या चर्च मैदानाचेर जाल्ले मॅचीच्या निर्धारीत वेळांत दोनूय क्लबांक गोल करपाक जमूंक ना. ताका लागून निकाल लावपाक टायब्रेकराचो आदार घेवचो पडलो.
टायब्रेकरांत आंबेली वतीन रिचर्ड फर्नांडीस, वेलरॉय फर्नांडीस, लेस्टन फर्नांडीस आनी गिलस्टन रिबेलो हांणी गोल केले, जाल्यार कुंकळ्ळी युनियना वतीन डेलन कार्व्हालो, मावझेन ऑलिव्हेरा, जॉलिटन फर्नांडीस आनी ब्रॅण्डली कार्व्हालो हांणी गोल केले. टायब्रेकरांत लेगीत दोनूय क्लब 4-4 अशे बरोबरींत उरिल्ल्यान निकाल लावपाक सडन डॅथाचो आदार घेतलो. हातूंत आंबेली वतन ओझेन सिल्वान गोल केलो जाल्यार कुंकळ्ळीच्या खेळगड्याक गोल करपाक अपेस आयलें.
ह्या जैतान आंबेली स्पोर्ट्स क्लबाक 40 हजाराचें इनाम आनी करंड फावो जालो, जाल्यार कुंकळ्ळी युनियनाक 30 हजार आनी करंडाचेर समाधान मानचें पडलें.
इनामां भेटवण सुवाळ्याक आदलो आंतरराष्ट्रीय खेळगडो डॅरीक परेरा मुखेल सोयरो म्हणून उपस्थीत आशिल्लो.
हेर वैयक्तीक इनामांः ओझेन सिल्वा (फायनलींतलो उत्कृश्ट गोलकीपर, आंबेली स्पोर्ट्स क्लब), डॅनविल फर्नांडीस (फायनलींतलो उत्कृश्ट डिफॅण्डर, कुंकळ्ळी युनियन), मेवझेन ऑलिव्हेरा (सर्तींतलो उत्कृश्ट मिडफिल्डर, कुंकळ्ळी युनियन), डेलन कार्व्हालो (फायनलींतलो पयलो गोल, कुंकळ्ळी युनियन), सारियो गोम्स (सर्तींतलो उदेंतो खेळगडो, सीआरीस चिंचोणे), चेडल फर्नांडीस (उत्कृश्ट चाली रचपी खेळगडो, सीआरसी चिंचोणे), शारियो गोम्स (सगल्यांत चड गोल आनी पयली हॅट्रीक, सीआरसी चिंचोणें).
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
