भांगरभूंय | प्रतिनिधी
सुभाष शिरोडकारः दरेकल्यान आपलो म्हाल विकसीत करपाचो उलो
भांगरभूंय । प्रतिनिधी
काणकोणः डॉ. बाबासाहेब आंबेडकर हांचे दूरदिश्टीन आनी विद्वत्तेक लागून भारतीयांक समानता मेळ्ळ्या. भारतीय लोकशाय ही सगळ्यांत श्रेश्ठ लोकशाय. प्रजासत्ताकांत आमकां अधिकार मेळ्ळे तशेंच जापसालदारक्यो दिल्यात. ते खातीर आमी शिस्त आनी लागणूक पाळची, अशें उदकास्रोत मंत्री सुभाष शिरोडकार हांणी सांगलें.
76 व्या प्रजासत्ताक दिसा निमतान काणकोण उपजिल्होदिकारी कार्यालया लागसार तिरंगो हुबयले उपरांत मुखेल सोयरे म्हूण मंत्री शिरोडकार उलयताले. ह्या वेळार नगराध्यक्ष सारा देसाय, नगरसेविका अमिता पागी, नगरसेवक हेमंत नायक गांवकार, काणकोणचे उपजिल्होधिकारी मधू नार्वेंकार, विक्री कर सहाय्यक आयुक्त मंथन नायक, मामलेदार मनोज कोरगांवकार, गायत्री नायक देसाय, पुलीस निरिक्षक हरीश राऊत देसाय, गौतम साळुंखे, नागरी पुरवण निरिक्षक उल्हास वेळीप आनी स्वातंत्र्यसैनिकांच्यो घरकान्न, विवीध कार्यालयांचे अधिकारी, कर्मचारी, शिक्षक, विद्यार्थी तशेंच हेर लोक हाजीर आशिल्ले.
1947 त भारताची लोकसंख्या 50 ते 60 कोटी आशिल्ली. ती आतां 141 कोटी जाल्या. विवीध धर्म, विवीध भासो आसून लेगीत ह्या देशांत समानतेचो अधिकारी सा. आतां देशांत अर्थीक समानता कशी येतली हाचेर विचार जावपाक जाय. बाराय म्हाल फाटीं उरचे नात हाचेर वेंचून आयिल्ल्या लोकप्रतिनिधींनी वावर करपाक जाय. दरेकल्यान आपलो म्हाल कसो विकसीत जातलो, हाचेर भर दिवपाक जाय, अशें मंत्री शिरोडकार हांणी सांगलें. ह्या सुवाळ्यांत मल्लिकार्जून विद्यालय, कात्यायणी बाणेश्वर विद्यालय, श्रीस्थळ अंगणवाडी, जवाहर नवोदय विद्यालय, लोकविश्वास प्रतिश्ठानाच्या विशेश भुरग्यांनी तशेंच सरकारी उच्च माध्यमीक विद्यालयाच्या विद्यार्थ्यांनी देशभक्तीचेर आदारीत गितां आनी नाच सादर केले. शिरीष पै हांणी सुत्रसंचालन केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
