भांगरभूंय | प्रतिनिधी
पणजीः मुख्यमंत्री डॉ. प्रमोद सावंत फाटलीं चार वर्सां आंबेडकर भवन बांदपाचीं फटीचीं आस्वासनां दितात. हे विशीं तांणी 2022 वर्सा केल्ली घोशणा आनी 2025 वर्सा केल्ली घोशणा एकूच असो आरोप काँग्रेसीचे प्रदेशाध्यक्ष अमीत पाटकार हांणी केला. सोमारा पणजेंत जाल्ले कार्यावळींत ते उलयताले. ह्या वेळार खासदार विरियातो फर्नांडीस, विरोधी पक्ष फुडारी युरी आलेमांव, आमदार कार्लोस फेरेरा, एल्टन डिकॉस्टा, गोंय प्रभारी सचीव डॉ. अंजली निंबाळकर हजर आशिल्लीं.
भाजप सरकार दलीत लोक आनी डॉ. बाबासाहेब अांबेडकर हांकां मानपी लोकांची फटवणूक करता. 2022 वर्सा सावन पर्वरींत आंबेडकर भवन बांदतले अशी घोशणा जाल्या, पूण हे बाबतींत फुडली कारवाय जायना. 2024 वर्सा हे इमारती खातीर 6.5 कोटी रुपयांची तजवीज जाल्या अशें सांगिल्लें. आतां ते म्हणटात 10 कोटी रुपयांची तजवीज आसा. स वर्सां मुख्यमंत्री म्हणून काम करून लेगीत तांकां ही इमारत बांदपाक मेळ्ळी ना. हातूंतल्यान भाजपाचीं लिपिल्लीं धोरणां उक्ती जाल्यांत, अशें अमीत पाटकार हांणी म्हणलें.
तांणी म्हणलें, भाजपा सध्या काँग्रेसीन संविधानांत जायते फावट दुरुस्ती केल्या असो प्रचार सुरू आसा. पूण काँग्रेसीन काळाची गरज म्हूण संविधानांत दुरुस्ती केली. गोंय मुक्ती, जनमत कौल, राज्याचो दर्जो आनी कोंकणी खातीर संविधानांत चार फावटी दुरुस्ती जाली. देशांत पयलेच सार्वमत (जनमत कौल) घेतलो. हाका लागून आमची स्वतंत्र अस्मिताय तिगोवन दवरपाक मेळ्ळी. काँग्रेसीन केल्ली घटनात्मक दुरुस्ती ही लजेची गजाल न्हय जाल्यार अभिमानाची गजाल. काँग्रेसीन गोंय खातीर केल्ली घटनात्मक दुरुस्ती चुकीची आशिल्ली काय ना हें मुख्यमंत्र्यांनी स्पश्ट करपाची गरज आसा.
ते पयलीं भाजप सरकार विरोधी पक्ष, एनजीओ, समाजीक वावुरप्यांचो आवाज चेंपपाचो यत्न करता असो आरोप युरी आलेमांव हांणी केलाे. धर्म आनी जातीच्या नांवान लोकां मदीं फूट घालपी राजकारणा पासून भाजपा वांगड्यांक सादूर रावपाचो सल्लो खासदार विरियातो फर्नांडीस हांणी दिला. काँग्रेस आसल्यारूच आंबेडकरांचें अपेक्षे प्रमाण भारत तिगून उरतलो अशेंय तांणी सांगलें.
आमदार फेरेरा डॉ. बाबासाहेब आंबेडकरां कडल्यान न्याय आनी समतेचा आदर्श घेवचो अशें सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
