भांगरभूंय | प्रतिनिधी
फोंडें, प्रतिनिधी ः आंबें – दाबाळ ह्या गांवांक जोडपी फुटब्रिज बांदून 32 म्हयने जाले तरी पुला खातीर गरजेचो जोडपी रस्तो बांदूंक नाशिल्ल्यान गांवांतल्या लोकां मदीं नाराजी निर्माण जाल्या. फुटब्रिज बांदपाक लागून बोटींतल्यान करपी प्रवास निमाणो बंद जाला. पूण आपत्कालीन वेळार गांवांत एम्ब्युलन्स लेगीत येवप कठीण जालां. देखून पुलाचो योग्य वापर करपाक मेळनाशिल्ल्यान लोकांनी नाराजगी उक्तायतात. मुख्यमंत्री डॉ. प्रमोद सावंत हांणी हाचेर गंभीर लक्ष दिवन हो जोडपी रस्तो पुराय करचो अशी मागणी थळावे लोक करतात.
सुमार साडेतीन वर्सां आदीं दाबाळ गांवांतल्यान थोड्याच अंतराचेर आशिल्ल्या आंबें गांवांत वटपा खातीर दुदसागर न्हंय हुपून बोटींतल्यान वच्चें पडटालें. देखून पावसाच्या दिसांनी विद्यार्थ्यांक घरांत दवरचें पडटाले. थळाव्या लोकांच्या मागणे प्रमाण राज्य सरकारान सुमार 10 कोटी रुपया खर्च करून एक फुटब्रिज बांदलो. 20 मे 2022 दिसा ह्या पुलाचें उक्तावण जालें. त्या वेळार राजकी फुडाऱ्यांनी गांवच्या लोकांक डिसेंबर 2022 मेरेन दोनूय वटांनी पुला खातीर जोडपी रस्तो बांदतले अशें आश्वासन दिल्लें. दाबाळच्या मुखेल रस्त्या पसून 100 अंतराचेर जोड रस्तो बांदपाची गरज आसा. पूण जोडपी रस्तो बांदपाची प्रक्रिया अजून सुरू जावंक ना.
फुटब्रिजाचें उक्तावण जावन 32 म्हयने जाले तरी लेगीत सरकारी अधिकाऱ्यांक जोडपी रस्तो बांदपाची प्रक्रिया सुरू करपाची ना अशें दिसता. जोडपी रस्तो बांदपाची परवानगी दिवपाक जमनीचो धनी तयार आसा. पूण सरकारी वेवस्था सारकी नाशिल्ल्यान जोडपी रस्तो बांदपाचो यत्न आतां मेरेन येसस्वी जावंक ना. ताचो परिणाम थळाव्या लोकांचेर जाला.
मजगतीं, धारबांदोड्यां पंचायत वाठारांतल्या आंबें गांवांतल्या दुदसागर न्हंयचेर बांदिल्लो हो फुटब्रिज पर्यटकांक आकर्शणाचें केंद्र जालां. फाटलीं दोन वर्सां धरणाचेर बांदिल्ल्या फुटब्रिजा लागसार जायते लोक पिकनिकेक येतात. फिल्म अभिनेतो आनी तियात्र कलाकार प्रसाद पंडित दर वर्सा भोंवडे खातीर हांगा येता. पूण फुटब्रिजा लागसार वाहनां व्हरपाक मेळनाशिल्ल्यान हांगा येवपी पर्यटकूय नाराजगी उक्तायतात.
दाबाळ आनी आंबें गांव जोडपी फुटब्रिजाचो रस्तो दाबाळ वटेन पुराय जावंक ना. हो जोडपी रस्तो किर्लपाल पंचायत वाठारांत पडटा. म्हत्वाचें म्हणल्यार किर्लपाल पंचायत वाठारांत सध्याचे आमदार गणेश गांवकार, आदले खासदार विनय तेंडुलकार, आदले मंत्री दीपक पाऊसकार आनी जिल्लो पंचायत वांगडी सुवर्णा तेंडुलकार अशे राजकारणी आसात. जाल्यार जोडपी रस्त्याक कळाव जावपाचें कारण नेमकें कितें आसूं येता? हो प्रस्न अजून सुटावो जावंक ना. सरकारान आनी संबंदीत खात्यान लक्ष दिवन हें काम बेगीन पुराय करचें अशी मागणी थळाव्यांनी केलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
