भांगरभूंय | प्रतिनिधी
केपें: गांवगिऱ्या वाठारांतल्या लोकांक आधार कार्ड दुरुस्ती करपाक खूबश्यो अडचणी येतात. हे खातीर तांकां बरी सुविधा मेळची हे खातीर खास पंचायतीन फुडाकार घेवन आधार कार्ड दुरुस्ती शिबिराचें आयोजन केलां, अशें आंबावलीचे सरपंच देविदास देयकार हांणी सांगलें.
आंबावली पंचायत सभाघरांत आयोजीत केल्ल्या आधार कार्ड दुरुस्ती शिबिराचें उक्तावण केले उपरांत सरपंच देयकार उलयताले. ह्या वेळार उपसरपंच सेबेस्तिना रिबेलोस, पंच रानिया कार्दोज, प्रिती गांवकार हाजीर आशिल्ली.
अशे तरेचें शिबीर हे आदींय पंचायतीन घेतिल्लें. मात खूबश्या जाणांच्यो दुरुस्ती करपाच्यो उरिल्ल्यो. थंय शिबीर घेवपाक भाजपा प्रदेशाध्यक्ष आनी खासदार सदानंद शेट तानावडे हांणी आदार केल्ले खातीर आमी तांचे उपकारी आसात, अशें सरपंच देयकार हांणी सांगलें. आधारकार्ड दुरुस्ती करपाचें शिबीर आयोजीत करपा फाटलें कारण म्हणल्यार खूबश्या जाणांचें आधार कार्ड दुरुस्त नाशिल्ल्यान खूबश्या सरकारी येवजण्यांचो लाव घेवपाक मेळना. हे खातीर सगळ्यांनी आधार कार्ड दुरुस्ती करून घेवची. तशेंच विश्वकर्मा आनी आभा कार्ड सुविधेचो लाव घेवचो, अशें पंच रानिया कार्दोज हांणी सांगलें. आधार कार्ड दुरुस्ती शिबीर 19 ते 24 फेब्रुवारी मेरेन चलतलें. सगळ्यांनी ताचो लाव घेवचो, अशीय विनवणी तांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
