भांगरभूंय | प्रतिनिधी
आदल्या तेंपार गर्मी सुरू जाली काय शाळांक सुटयो पडटाल्यो. मागीर भुरगीं गांवां लागसार आशिल्ल्या रानांनी भोंवपाक वतालीं. थंय पावतकच रानमेव्याच्या परमळान सामकीं पिशीं जातालीं. रानांत काण्णां (करवंदां), धवींफुल्ल चुन्नां, चारां, चाफरां, मुट्टे, धवे वा गुलाबी जांब, जांबळां खावपाक मेळटालीं. ल्हान – ल्हान आंबट गोड नाजूक काण्णां तर राशींनी आसतालीं. महाराष्ट्रांत ताका दोंगराची काळी मैना अशें म्हणटात.
हरवीं काण्णां तर बरीं धुवून मीठ भरून खळाक घालताले. आयजूय गांवांनी ती पद्दत आसा. उटंगाराचो पावस पडटालो तेन्ना उकड्या तांदळाचे हुनहुनीत पेजे वांगडा तोंडाक लावपाक तीं काण्णां भायर काडटाले. खारट, आंबट, कुरकुरीत कांण्णा खातना मजा येताली. काण्णाचे भलायकेचे नदरेन खूबच फायदे, गुणधर्म आसात. काण्णा खाल्यार आमची रोगप्रतिकार शक्त वाडटा. तातूंत भरपूर प्रमाणांत ‘क’ जीवनसत्व आसता. जें अॅण्टीओक्सीण्ट. ताका लागून हानी जावपी गजालीं पसून कुडीची राखण जाता. हें फळ रानांत वाडिल्ल्यान रुचीक तर आसतातूच, पूण खूबशीं दुयेंसां जावपा पसून तें मनशाक वाटायता.
काण्णांनी क आनी अ जीवनसत्व खूब प्रमाणांत आसता. हे दोनूय घटक आमची कात निरोगी दवरता. मुखामळाचेर सुरकुत्यो पडपाक दिना. क जीवनसत्व कात खरखरीत जावपा पसून वांचयता. काण्णांतले ई जीवनसत्व सुर्याच्या हानीकारक वता पसून राखण करता. अ जीवनसत्व आमच्या दोळ्यांची नदर सुदारता.
काण्णांत फायबर खूब आसता. देखून आमचे कुडींतली चरबी आनी वजन नियंत्रणांत दवरता. भूक कमी लागता. हिमोग्लोबिनाची पातळी वाडयता. काण्णांनी पाॅटेशियम भरपूर आसता. ताचो काळजाच्या दुयेंतींक फायदो जाता. कॅल्शियमाक लागून हाडां घटमूट उरता. क जीवनसत्व आशिल्ल्यान कॅन्सर जावपाची शक्यताय उणी जाता. काण्णां खूब दुयेंसां पसून मनशाची राखण करता. काण्णां म्हणल्यार भलायकेचेर रामबाण उपाय. हालीं तेपार तीं सहसा पळोवपाक मेळना. तीं काडपाक रानांत हेडपीय भुरगींय उणीं जाल्यांत. आतां लोणच्याचे बाटलेंत एक- दोन काण्णां मेळटात तितलींच.
सिद्धी तिळवे
9158200956
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
