भांगरभूंय | प्रतिनिधी
फाल्यां सगळ्यो शिक्षणीक संस्था बंद
हैदराबाद, खबरां संस्था: आंध्र प्रदेश आनी तमिळनाडूच्या दर्यादेगेवेल्या वाठारांत सांजवेळा मिचॉंग चक्रीवादळ येवपाची शक्यताय आसा. वादळाक लागून तमिळनाडूंतल्या महाबलीपुरम दर्यादेगेर उदकाची पातळी सुमार ५ फूट वाडल्या.
तमिळनाडू सरकारान आयज सोमारा गरजेच्यो सेवा सोडल्यार पुराय राज्यांत भौशीक सुटी जाहीर केल्ली. हवामान खात्यान तमिळनाडूंतल्या चेन्नई, चेंगलपट्टू, तिरुवल्लूर आनी कांचीपुरम ह्या शारांनी फाल्यां व्हड पावसाची शिटकावणी दिल्या.
एनटीआर जिल्ह्यांत सगळ्यो शिक्षणीक संस्था बंद दवरल्यात. एनडीआरएफचे २१ युनीट दोनूय राज्यांनी बचाव कार्यावळी खातीर तैनात केल्यात.
मिचॉंग हें बंगालच्या दर्यांत निर्माण जावपी चवथें आनी अंदूंचें हिंदी महासागरांतलें सवें वादळ. म्यानमारान ह्या वादळाला ‘मिचॉंग’ नांव दिलां. मिचॉंग म्हळ्यार बळगें आनी लवचीकपणा.
ओडिशांतल्या ५ जिल्ह्यांनी ऑरेंज अलर्ट
वादळाक लागून ओडिशांत ६ डिसेंबर मेरेन पावसाची शिटकावणी जारी केल्या. हवामान खात्यान आयज, फाल्यां मलकानगिरी, कोरापुट, रायगडा, गजपती आनी गंजम जिल्ह्यांत यलो अलर्ट आसतलो.
सुरवेक ३५ ते ४५ किमी दर वराक, उपरांत फुडल्या १२ वरांनी वार्याचो वेग ६० किमी मेरेन वाडपाक शकता.
वादळाक लागून १४४ रेल्वे रद्द
वादळाक लागून मध्य रेल्वेन ३ ते ७ डिसेंबर मजगतीं धांवपी १४४ गाडयो रद्द केल्यात. रेल्वे अधिकार्यांनी दिल्ले म्हायती प्रमाण, ह्या वाठारांतल्यान चेन्नय, बंगळुरू, हैदराबाद, नवी दिल्ली, हावडा, लखनौ, विशाखापटणम, तिरुपती, पुद्दुचेरी आनी हेर मार्गांचेर धांवपी गाडयो रद्द केल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
