भांगरभूंय | प्रतिनिधी
कुर्नूल, खबरां संस्था: आंध्र प्रदेशांतल्या कुर्नूल – चिन्नाटेकुर लागसार एके खाजगी बसीक उजो लागलो. हे दुर्घटनेंत 20 प्रवासी लासले. कांय माध्यमांच्या वृत्ता प्रमाण, हो आंकडो 25 इतलो आसा. ही घडणूक शुक्रारा फांतोडेर सुमार 3:30 वरांचेर घडली. मरण आयिल्ल्यांचो आंकडो वाडपाक शकता.
हैदराबादच्यान बंगळुरू वचपी बसीन एके दुचाकीक धपको दिलो. दुचाकी बसी पोंदाक गेली आनी पेत्रोचे टांकयेक आपटली. हाका लागून बसीक उजो लागलो. दुर्घटनेंत शिवशंकर नांवाच्या बस चालकाकूय मरण आयलें. बसींत सुमार 40 प्रवासी आशिल्ले. तांतले खुबशे जाण लासल्यात. 19 जाणांनी बसींतल्यान उडी मारून जीव वाटयलो. इमर्जन्सी दार मोडून जीव वाटोवपी लोक गंभीर लाशिल्ले. तांकां कुर्नूल सरकारी हॉस्पिटलांत दाखल केले.
पुलिसांच्या म्हणण्या प्रमाण, खुबश्यो कुडी पुरायेन लासल्यात. हाका लागून तांची वळख पटप कठीण आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
