भांगरभूंय | प्रतिनिधी
अमरावतीः आंध्र प्रदेशांतल्या अल्लूरी सीताराम राजू (ASR) जिल्ह्यांत जाल्ल्या भिरांकूळ बस अपघाता उपरांत राज्य सरकारान एजन्सी आनी रान वाठारांतल्या घांट रस्त्यांचेर रातच्या वेळार प्रवास करपाक बंदी घाल्या. ह्या अपघातांत 9 जाणांक मरण आयलें जाल्यार खुबशे जाण जखणी जाल्यात.
भक्तांक व्हरपी खाजगी बस फांतोडेर घांट रस्त्या वयल्या ओल्ताचेर नियंत्रण गेल्ल्यान रस्त्या कुशीकच्या देंगणांत कोसळ्ळी. धुकें, वांकडी ओलता आनी उणे दिसप हीं अपघाताचीं मुखेल कारणां आशिल्ल्याचें सुरवातेच्या तपासांत दिसून आयलां.
नव्या आदेशा प्रमाण, खाजगी बस, मोटारी, जड वाहनां सयत सगळ्या प्रकारच्या वाहनांक ही बंदी लागू जातली. खास करुन रातच्या वेळार आनी फातोडेर धुक्याक लागून घांटांचेर गाडी व्हरपाक मेळची ना. अपघात जावपाक कारण थारपी जाग्यांचेर शिटकावणी बोर्ड लावपाक आनी घांट रस्त्यांचेर फकत अणभव आशिल्ल्या आनी खासा परवानो आशिल्ल्या ड्रायव्हरांकूच गाडी चलोवंक परवानगी दिवची असो आदेश गृह विभागान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
