भांगरभूंय | प्रतिनिधी
विशाखापट्टणम, खबरां संस्था ः आंध्र प्रदेशांतल्या अनंतपूर जिल्ह्यांतल्या अच्युतपुरम उद्देगीक वाठारांतवे आंतरराष्ट्रीय बोगस कॉल सेंटर उक्ताडार हाडले. ह्या प्रकरणांत 33 जाणांक अटक केल्या. तातूंत दोन मास्टरमायड आसात. फाटल्या 2 वर्सांत कॉल सेंटर चलोवप्यांनी सुमार 600 कोटी रुपयांची फटवणूक केल्या अशें पुलिसांनी सांगलें.
22 मे दिसा थळाव्या महसूल अधिकाऱ्यां कडल्यान मेळिल्ले म्हायती आनी गुप्तचर म्हायतीचेर आदारून तीन सुवातींनी धाड घाली. थंयच्यान 3 लाख रुपया रोख, संगणक, नेटवर्क उपकरणां, लक्झरी गाडयो आनी हेर वस्तू जप्त केल्यात. पुलिसांच्या म्हणण्या प्रमाण ह्या सुवातेर पुराय कॉल सेंटर चलताले. अमेझॉन सपोर्ट आनी व्हॉयस ओव्हर इंटरनॅट प्रोटोकॉल (VOIP) वरवीं ही फटवणूक जाताली अशें अनकापल्लेचे डीएसपी विष्णू स्वरूप हांणी सांगलें.
हें कॉल सेंटर नोकरी सोदपी लोक सोदतात. ते खातीर योग्य ऑनलायन जॉयनिंग प्रक्रिया चालीक लायली. तांची रावपाची आनी जेवणाची वेवस्था केल्ली. हाचे उपरांत सगळ्यांक सुमार सप्तकभर कॉल सेंटरांत काम करपाचें प्रशिक्षण दिलें. तांकां उच्च तंत्रज्ञानाचीं उपकरणां वापरपाक शिकयलें. हाचे उपरांत हे लोक अमेरिकन नागरिकांचो अर्थीक तपशील काडटाले. ते तांकां बोगस फोन करताले.
फटवणुक कशी करतात?
फोन करप्यान अमेरिकन नागरिकांक अमेझॉन सपोर्टा खातीर काम करपी अशी आपली वळख करून दिली. ते भायर तो अमेरिकेच्या बँकेचो कर्मचारी वा वरिश्ठ अधिकारी अशेंय सांगतालो. ते उपरांत स्कॅमर अमेरिकन नागरिकांक गिफ्ट कार्ड रिडेम्पशन सयत हेर ऑफरांचे हांयस दाखयतालो. जे तातूंत सांपडले तांकां गिफ्ट कार्डां घेवपाक सांगतालें. मागीर तांकां कोड शेअर करपाक सांगताले. लोकांनी कोड शेअर केले बरोबर तांची फटवणुक जाताली. उपरांत स्कॅमर आंतरराष्ट्रीय चॅनल वापरून हेर स्कॅमरांक धाडटाले.
ह्या प्रकरणांतल्या दोग मास्टरमायड सयत आजून 4 जाणांक अटक केल्या. पुराय रॅकेट उक्ताडार हाडपा खातीर हेर चवकशी सुरू आसा अशें पुलिसांनी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
