भांगरभूंय | प्रतिनिधी
-मुख्यमंत्र्यांच्या कारवायेच्या आस्वासना उपरांत मंत्री, आमदारांचें समाधान
पणजी : कलम 39 ए विरोधांतलें आंदोलन आनी नगरनियोजन मंत्र्यांच्या बंगल्याचेर व्हेल्ल्या मोर्चाक लागून भारतीय जनता पक्षा मदीं हुस्क्याचें वातावरण तयार जालां. हातूंतल्यान सरकार विरोधी जनमत तयार जावपाक मजत जातली आनी शिवाय विरोधकांक बळगे प्राप्त जातलें, अशी भिरांत बसकेत उक्तायली. खाजगी बंगल्याचेर मोर्चा व्हरपी फुडारी तशेंच आंदोलकांचेर खर कारवाय करपाचें आस्वासन मुख्यमंत्री डॉ. प्रमोद सावंत हांणी बसकेत दिले. हाचे उपरांत मंत्री, आमदारांचें समाधान जाले.
नगरनियोजन कायद्याच्या कलम 39 ए आड आरजीचे आमदार विरेश बोरकार हांचे उपोशण सुरू आसा. सामाजीक कार्यकर्ते तशेंच विरोधी पक्षांचो उपोशणाक तेंको आसा. झोन बदला आड पाळे शिरदोन ग्रामस्थांनी शुक्रारा आंदोलन सुरू केल्ले. दिसांन दीस आंंदोलनाची धार वाडत गेली. सोमारा सांजे नगरनियोजन मंत्री विश्वजीत राणे हांचे बंगल्याचेर मोर्चा व्हेलो. बंगल्या भायर मंत्र्याक वायट उतरा दिली. मंत्र्याच्या खासगी बंगल्याचेर मोर्चा व्हरपाची गजाल अयोग्य आसा. आंदोलन खर जाता मात सरकार कितेंच करिना, असो मुद्दो आमदारांनी मांडलो. हाचो सगळे आमदार तशेंच मंत्र्यांक फटको बसतलो, असो मुद्दो आमदारांनी मांडलो. हाची दखल मुख्यमंत्री डॉ. प्रमोद सावंत तशेंच प्रदेश अध्यक्ष दामू नायक हांकां घेवची पडली.
आंदोलन फाटीं घेवपा खातीर सरकाराचे यत्न सुरू आसा. मंत्र्याच्या बंगल्याचेर मोर्चा व्हरपी फुडारी तशेंच आंदोलकांचेर खर कारवाय जातली. सरकार कोणाकूच सोडचें ना, अशें आस्वासन मुख्यमंत्री डॉ. प्रमोद सावंत हांणी बसकेत दिलें. प्रदेश अध्यक्ष दामू नायक हांणी लेगीत पक्ष सरकार तशेंच नगरनियोजन मंत्र्यां फाटल्यान घटमूट उबें आसा, अशी हमी दिली.
आमदार निलेश काब्राल, कृष्णा साळकार, मायकल लोबो हांणी कारवायेची मागणी केली. आंदोलन सुरूच उरले आनी सरकारान ठोस निर्णय घेतलो ना, जाल्यार सरकार कितेंच करिना, असो संंदेश लोकां मदीं वतलो, अशें कृष्णा साळकार, मायकल लोबो हांणी बसकेत सांगलें.
मंत्री बाबूश मोन्सेरात, मायकल लोबो, कृष्णा साळकार तशेंच हेर आमदारांनी बेगिनात बेगिन निर्णय घेवपाची मागणी केली. मंत्र्याच्या खाजगी बंगल्याचेर मोर्चा व्हरप अयोग्य आसा. हाचे फुडें हेर मंत्री तशेच आमदारांच्या घराचेर मोर्चा येतले. खाजगी घराचेर मोर्चा व्हरपाचो पायंडो पडपाक जाय ना. आंदोलनाचेर तोडगो काडपा सयत मोर्चा व्हरपी लोकांचेर कारवाय करपाची मागणी हांवे बसकेत केली. सगळ्या आमदार, मंत्र्यांनी तेंको दिलो, अशें निलेश काब्राल हांणी सांगलें. आंदोलनाक लागून सरकार तशेंच पक्षाची प्रतिमा इबाडटा आनी विरोधकांचो प्रभाव लोकांचेर पडटा, असो मुद्दो लेगीत मांडलो.
बसके उपरांत फायली गायब जाल्याची म्हायती मुख्यमंत्र्यांनी पत्रकारांक दिली. आमदार, मंत्र्यांच्या मागणे प्रमाण गुन्यांव लेगीत नोंद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
