आंदोलन जालें खुबूच उग्र

भांगरभूंय | प्रतिनिधी

39 (अ) आड मंत्री राणे हांच्या बंगल्या मुखार धरणें

रातभर रस्त्यार न्हिदपाचो आंदोलकांचो निश्चेव

आझाद मैदाना वयल्या म्हाआंदोलना उपरांत मोर्चो

भांगरभूंय । प्रतिनिधी

पणजी : नगर नियोजन कलम 39 (अ) आड आनी विरेश बोरकार हांका न्याय मागपी म्हाआंदोलन खूब उग्र जालें. पुलिसांच्या बंदोबस्ताक किकोंत करीत शेंकड्यांनी आंदोलकांनी नगर नियोजन मंत्री विश्वजीत राणे हांच्या दोनापावलाच्या खाजगी बंगल्या मुखार धरणें धरलें. ह्या आंदोलनाक लागून पुराय दोना पावला विस्कळीत जालें. पूण जे मेरेन मागण्यो पुराय जायनात ते मेरेन पुराय रातभर रस्त्यार न्हिदपाचो निश्चेव आंदोलकांनी केल्लो तशेंच आमदारांनी तांचे वांगडा रावपाची तयारी दाखयिल्ली.

रातीं उसरां आंदोलकांनी आपलो मोर्चो नगरनियोजन मंत्री राणे हांच्या दोना पावलाच्या बंगल्या वयल्यान परतून आझाद मैदानाचेर घुंवडायलो. आमदार विरेश बोरकार हांची भलायकी इबाडत चल्ल्या, हे खातीर आंदोलनाची फुडली दिशा आझाद मैदानाचेर थारतली, अशी म्हायती आरजीपी फुडारी अजय खोलकार हांणी दिली.

ताचे पयलीं वादग्रस्त कलम 39 (अ) रद्द करप तशेंच सांत आंन्द्रेचे आमदार विरेश बोरकार हांकां धक्काबुक्की करपी पुलिसांक निलंबीत करप, ह्यो दोनूय मुखेल मागण्यो घेवन आंदोलकांनी आझाद मैदानाचेर म्हाआंदोलन आपयिल्लें. ह्या आंदोलनाक गोंयभरा सावन लोक व्हडा संख्येन हजर आशिल्ले. आंदोलनाचे सभेक सुरवात जातकत आयोजकांनी नगर नियोजन मंत्री विश्वजीत राणे हांच्या घरा कडेन मोर्चो घुंवडापाचें जाहीर केलें.

विरोधी पक्ष फुडारी युरी आलेमांव, बाणावलेचे आमदार वेन्झी व्हिएगस, हळदोणेंचे आमदार कार्लुस फेरेरा, आरजीपीचे अध्यक्ष मनोज परब हांच्या फुडारपणा खाला चलत मंत्री राणे हांच्या बंगल्या कडेन वचपाक सुरवात केली. तांकां पुलिसांनी दोन-तीन कडेन आडावपाक सुरवात केली. पूण पुलिसांचो बंदोबस्त मोडीत ते चलत रावले. मिरामार तांकां आडावपाचो खूब यत्न जालो. पूण तांणी दर्यादेगे वयल्यान चलपाक सुरवात केली.

पुलिसांनी दोना पावला सर्कला मुखार बशी आडावन बॅरीकेड घालून पुराय रस्तो बंद केलो. पूण राणे हांचे दोन बंगले आशिल्ल्यान मंत्री राणे खंयच्या बंगल्यार नेमके आसात तें खबर नाशिल्लें. जे आंदोलक पयलीं आपले गाडयांनी गेले ते पयलीं दोना पावल पाविल्ल्यान तांकां वाटेर आडावपाक पुलिसांक येस आयलें. पूण जे आंदोलक चलत येताले तांणी पुलिसांक बुचकळ्यांत घालून आपली वाट बदल्ली. इस्काती आशिल्ले पांयवाटेंतल्यान चडून ते मंत्र्याच्या बंगल्यार पावले आनी मंत्र्या आड घोशणा दिवपाक सुरवात केली.

हे मजगती आंदोलक विस्कळीत जाले. चडशे आंदोलक मंत्र्याच्या बंगल्या मुखार पावपाक येसस्वी थारले, जाल्यार कांय आंदोलकांनी पांयवाट्यो सोदून मंत्र्याचो दुसरो बंगलो आयव्हाव हांगासर पावले. पूण थंस खर बंदोबस्त आशिल्ल्या पुलिसांनी तांकां भितर सरपाक दिवंक ना.

आतां सध्या आंदोलकांनी दोना पावल सावन बांबोळे वचपी दोनूय वटेनचे रस्ते आडावन दवरल्यात. एक वटेनचो रस्तो आंदोलक आनी दुसरे वटेनचो रस्तो पुलिसांनी आडावन दवरिल्ल्यान ताळगांव, करंजाळे वचपी लोक तशेंच पर्यटकांचे हाल जाले. आंदोलक अजून मेरेन मंत्र्याच्या बंगल्या मुखा वयलो म्हामार्ग आडावन बसल्यात आनी घोशणा दिवप चालूच दवरलां. खंयचेच परिस्थितींत थंयच्यान हालप ना, असो निश्चेव आंदोलकांनी केला.

हें म्हाआंदोलन येसस्वी करपा खातीर गोंयभरा सावन लोक बशींनी येवपाक भायर सरिल्ले. पूण पुलिसांनी ह्यो बशी आडयल्यो. पुलिसांनी पणजे येवपी गोंयभर 11 बशी आडयल्यात आनी सरकार ह्या आंदोलनाक कितलें भियेलां हें दिसून येता. उपरांत विरोधी आमदारांनी मध्यस्थी केले उपरांत ह्यो बशी सोडल्यो.

मुख्यमंत्र्याच्या विधाना उपरांत कायदेशीर तरेन आंदोलन करपाचो उलो आयोजकांनी मारलो.

आमकां कायदो हातात घेनासतना अहिंसेच्या मार्गान आंदोलन करपाक जाय. मुख्यमंत्र्यान शिटकावणी दिल्लीच आसा. जर आमी कायदो हातात घेतलो जाल्यार पुलिसांक निमीत मेळून आमचेर कारवाय सुरू करतले. देखून कसलीच आगळीक करिनासतना पुराय रात हांगासर आमी रावुया, अशें आरजीपीचे भांडारी अजय खोलकार हांणी सांगलें.

विजय सरदेसाय हांची कूस

मंत्री राणे हांच्या बागल्या वटेन मोर्चो घुंवडावपाचें जाहीर जाले उपरांत विजय सरदेसाय हे आझाद मैदाना वयल्यान भायर सरले. हे विशींचें कारण तांकां विचारल्यार सरदेसाय हांणी सांगलें, कायद्यांचें विधानसभेंत चर्चा करून ते बदलपाक जाय. आमी कोणाच्या खाजगी घरांत वचून आंदोलन करपाक शकनात. हांव फक्त विरेश बोरकार हांकां तेंको दिवपा खातीर आयिल्लों.

बोरकार हांचे आझाद मैदानाचेर उपोशण चालूच

न्याय मागपा खातीर विरेश बोरकार हांच्या उपोशणाचो सोमारा तिसरो दीस आशिल्लो. अन्न आनी उदका बगर राविल्ले बोरकार हांची भलायकी खुबूच इबाडल्या, देखून तांणी आंदोलनांत वांटो घेवचे बदला आझाद मैदानाचेरूच विसव घेतलो. ह्या वेळार कांय आंदोलक बंगल्यार वच्चे सोडून बोरकार हांच्या सांगाताक रावले.