भांगरभूंय | प्रतिनिधी
-39 ए विशीं कसलोच निर्णय जावंक ना
पणजी : नगरनियोजन कायद्याच्या कलम 39 ए विशी कसलोच निर्णय जावंक नाशिल्ल्यान आमदार विरेश बोरकार आनी आंदोलनाची स्थिती जैसे थे आसा. सांत आंद्रें मतदारसंघात 39 ए खाला मान्यताय दिल्ले प्रस्ताव स्थगीत दवरपाचो निर्णय मुख्यमंत्र्यांनी घेतलो. ह्या निर्णयाचेर आमदार विरेश बोरकार हे समाधानी ना. तांणी उपोशण सुरूच दवरिल्ल्यान स्थिती आनीक चिगळपाची शक्यता आसा. आंदोलन दर दिसा नवे मोडण घेत आसा.
राज्याचे अर्थसंकल्पी अधिवेशन 6 मार्च सावन सुरू जातलें. बुधवारा कामकाज सल्लागार समितीची बसका जाले उपरांत सांजे मंत्रीमंडळाची बसका जाली. सांजे भाजपाच्या सुकाणू समितीची बसका जाली. कामकाज सल्लागार समितीच्या बसकेत अधिवेशनाच्या कामकाजाचेर चर्चा जाली. मंत्रीमंडळ बसकेत मात कलम 39 ए विशीं कसलोच निर्णय जालो ना. नगरनियोजन मंत्री विश्वजीत राणे तशेंच मुख्यमंत्री डॉ. प्रमोद सावंत हांणी मंत्रिमंडळ बसके उपरांत कलम 39 ए चेर उलोपाक न्हयकार दिलो. आरजी, काँग्रेस आनी हेर विरोधी पक्षांनी मात आंदोलनाक तेंको दिवपाचो निर्णय कायम दवरला.
…….
मुख्यमंत्र्यांचो प्रस्ताव अमान्य
मंगळारा राती उसरा नगरनियोजन मंत्री विश्वजीत राणे आनी मुख्यमंत्री डॉ. प्रमोद सावंत हांची बसका जाली. सांत आंद्रें मतदारसंघात कलम 39 ए खाला जे प्रस्तावांक मान्यताय दिल्या ते स्थगीत दवरपाचो निर्णय जालो. प्रस्ताव स्थगीत दवरपाचें पत्र आमदार विरेश बोरकर हांका दितले. नगरनियोजन मंडळाच्या बसकेत ह्या प्रस्तावाक मान्यताय घेवची पडटली. हाका 8 दीस लागतले. आमदार विरेश बोरकर हांणी उपोशण फाटीं घेवचें, अशें आवाहन मुख्यमंत्री डॉ. प्रमोद सावंत हांणी बसके उपरांत राती उसरा केले. हाचेर आमदार विरेश बोरकार हांचें समाधान जाले ना. उपोशण फाटीं घेवपाचो प्रस्ताव आमदार विरेश बोरकार हांणी अमान्य केलो. हाका लागून तोडगो काडपाचो मुख्यमंत्र्यांच्या येत्नाक यश आयले ना.
हाचे पयली सोमारा राती मुख्यमंत्री डॉ. प्रमोद सावंत आनी सभापती गणेश गांवकार हांणी विरेश बोरकार हांची आझाद मैदानाचेर भेट घेवन ताची समजूत काडली. चर्चेच्या आदारान मागण्यो मान्य करून घेवच्यो, असो सल्लो सभापती गणेश गांवकार हांणी तांकां दिल्लो.
…………
बदली नाका, पुलिसांचे निलंबन करपाची मागणी
आमदार विरेश बोरकार हांकां नगरनियोजन कार्यालयांत भायर काडपी पणजीचे पोलिस निरीक्षक विजयकुमार चोडणकार आनी हेर पुलिसांची बदली जाल्या. आमदाराक भायर काडपी पुलिसांची बदली करप पुराय थारा ना, तांका निलंबित करपाची मागणी विरोधी पक्षाच्या आमदारांनी केल्या. काँग्रेस विधीमंडळ फुडारी युरी आलेमाव आनी आमदार विजय सरदेसाय हांणी हो मुद्दो कामकाज सल्लागार समितीच्या बसकेत मांडलो. पुलिसांचेर कारवाय करपाची मागणी सभापतींकडेन तांणी केली. कलम 39 ए रद्द करपा सयत पुलिसाच्या निलंबनाची मागणी लेगीत आसा.
………..
कलम 39 ए चेर सभाघरात चर्चा जावची
कलम 39 ए रद्द जावपाच्या मागणे खातीर आंदोलन सुरू आसतानाच हाचेर सभाघरात चर्चा जावपाची मागणी काँग्रेस विधीमंडळ फुडारी युरी आलेमाव हांणी केल्या. आदले न्यायाधीश फेर्दिन रिबेलो हांणी तयार केल्या मसुद्याचेर आधारीत विधेयक हांव अधिवेशनात मांडटलो. हे विधेयक चर्चेक घेवपाक जाय. हे विधेयकाचेर आधारीत कलम 39 एचेर चर्चा जावपाक जाय, अशें युरी आलेमांव हांणी म्हणला.
………..
खाजगी बंगल्याचेर मोर्चा हाडप अयोग्य, कारवाय करची
मंत्र्यांच्या खाजगी बंगल्याचेर मोर्चा व्हरपाची कृती अयोग्य आसा. हाका लागून मंत्र्याच्या कुटुंबाक धोको निर्माण जावपाची शक्यता आसता. खाजगी बंगल्याचेर मोर्चा व्हरपी लोकांचेर कारवाय करची, अशी मागणी महसूल मंत्री बाबूश मोन्सेरात हांणी केल्या.
………
भाजपाचो सरकाराक तेंको
आंदोलना लोकशाय मार्गान जावपाक जाय. मंत्र्याच्या बंगल्याचेर मोर्चा व्हरपाची कृती अयोग्य आनी झुंडशाही स्वरूपाची आसा. आंदोलना परस चर्चेन प्रश्न सुटावाे करपाचे येत्न आमदारांनी करपाक जाय. भारतीय जनता पक्ष सरकारा फाटल्यान आसा, अशें प्रदेश भाजप अध्यक्ष दामू नायक हांणी म्हणला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
