आंदोलनाक भियेल्ल्या भाजपाचो गोंयकारांक धमकावपाचो यत्नः आप

भांगरभूंय | प्रतिनिधी

भांगरभूंय । प्रतिनिधी
पणजीः आमी चार लाखांची फामिली आसा देखून आंदोलन करचे पयली चितात अशी धमकी भाजपान गोंयकारांक दिल्या. सराकारा आड लोकांचो आनी विरोधकांचो एकवट पळोवन भाजप भियेला देखून असल्यो धमक्यो दिता. पूण आमी भाजपाच्या धमक्यांक भीक घालचे नात, अशें आम आदमी पक्षाचे गोंय संयोजक अमित पालेकार हांणी म्हणलां.
रामा काणकोणकार हांचे आड हल्ल्याचो निशेध करतना आंदोलकांनी भाजपाचे कार्यालय लेगीत लक्ष केले. भाजपान हे विशीं खर आक्षेप घेवन ‘एक्सा’र म्हणलां, ‘आमी गोंयात चार लाख वांगड्यांची आनी देशांत 14 कोटी वांगड्यांची बळीश्ट फामिली आसा. दोन फावटी चितात आनी फुडाराक जापसालदारकेन वागात.’ हाका आक्षेप घेतना अमित पालेकार पत्रकार परिशदेत उलयातले. ह्या वेळार आपचे फुडारी श्रीकृष्ण परब आनी संदेश तेळेकार हाजीर आशिल्ले.
जनगणना 2011 प्रमाण गोंयची लोकसंख्या 17 लाख आसा आनी आतां 20 लाख मेरेन पावल्या आसूं येता. 17 लाख लोकसंख्या धरली जाल्यार भाजपची 4 लाख फामिली लोकांक धमकयता, असो आरोप पालेकार हांणी केलो.
पूण उरिल्ले 13 लाख गोंयकार आसात तांकां जे गोंयां घडटा, जे गुन्यांव जातात ते बरें दिसता काय? भाजप केन्ना गुन्यांवकारी घडणुकांचेर उलयला? गोंयांत शुक्ररा विरोधी आमदार, लोक, समाज वावुरपी एकवटले ते एका पक्षाचे मनीस न्हय तर ते गोंयकार आशिल्ले. ते फकत रामा खातीर उभे रावूंक नाशिल्ले पूण दरेक गोंयकारां खातीर उबे आशिल्ले, अशें पालेकार हांणी सांगलें.
शुक्रारच्या आंदोलनांत सगळ्या गोंयकारांचो आनी विरोधकांचो जाल्लो एकवट ह्या एका गजाली खातीर भियल्यात आनी धमकी दितात. 17 लाखा मदले 13 -14 लाख गोंयकारांक भाजप नाका आनी ते तुमकां मत मारनात. देखून धमकी दिवचे पयली विचार करात. जर तुमची 4 लाखांची फामिली आसा जाल्यार आमचेर मोर्चा हाडून दाखयात, अशें आव्हान पालेकार हांणी केलां.
भाजपाचे सोशल मिडयान चार- पांच लोकांची मुलाखत घेवन लोकांक त्रास जालो म्हूण बोवाळ केलो. पूण ह्या वेळार आंदोलकांनी स्कुलाच्या भुरग्यांक सोडले. पूण ते वेळार सिंघम पुलिसांनी म्हजेर आनी आंदोलकांचेर हल्लो करपाचो यत्न केलो. लोकांचेर बडयो पडल्यो. भाजप जेन्ना भिता तेन्ना पुलिसांक फुडें हाडटा ना जाल्यार धमकी दिता, असोय आरोपूय पालेकार हांणी केलो.