भांगरभूंय | प्रतिनिधी
नवी दिल्ली, खबरां संस्था ः भारतीय नंबरांतल्यान येवपी सगले बनावट आंतरराष्ट्रीय कॉल आडावपाचे निर्देश सरकारान दूरसंचार ऑपरेटर्सांक दिल्यात. दूरसंचार खात्या कडेन हें विशीं (DOT) कागाळी येताल्यो. बनावट कॉलां वरवीं सायबर गुन्यांव आनी अर्थीक फटवणूक जाता.
खंयच्याय भारतीय दूरसंचार गिरायका मेरेन पावपी आंतरराष्ट्रीय बनावट कॉल वळखुपाक आनी आडावपा खातीर दूरसंचार खात्यान आनी दूरसंचार सेवा पुरवणदारांनी (TSPs) संयुक्तपणान एक प्रणाली तयार केल्या. आतां टीएसपींक अशे आंतरराष्ट्रीय बनावट कॉल आडावपाची सुचोवणी दिल्या. दूरसंचार खात्यान जारी केल्ल्या सुचोवण्यां प्रमाण टीएसपी पयलींच भारतीय लॅंडलायन क्रमांकांचेर आंतरराष्ट्रीय बनावट कॉल ब्लॉक करतात.
तरी लेगीत फटवणूक जाता वा बनावट कॉल येतात जाल्यार तुमी संचार साथी वा चक्षूचेर वचून कागाळ नोंद करुंक शकतात.
चक्षू म्हणल्यार कितें, कागाळ कशी करची?
० चक्षू पोर्टल लिंक sancharsaathi.gov.in ह्या संकेतथळार उपलब्ध आसा. चक्षू खातीर एक अॅप तयार करपाचेर सरकार वावुरता. फटवणूकीच्या हेतान तुमकां खंयचोय कॉल, एसएमएस वा व्हॉट्सअॅप संदेश आयलो जाल्यार तुमी पोर्टलाचेर कागाळ नोंद करुंक शकतात.
० कागाळींत कॉल वा एसएमएसाची वेळ, तारीख आनी संबंदीत सगळी म्हायती दिवची पडटली. अशा कॉल वा संदेशाचो स्क्रीनशॉटय रेकॉर्ड म्हणून दिवचो पडटलो.
० लक्षांत दवरात जर कोणूय सायबर गुन्यांव वा फटवणूकाक बळी पडल्यार ‘चक्षू’ पोर्टल, भारत सरकाराच्या सायबर गुन्यांव हेल्पलायन क्रमांक 1930 वा www.cybercrime.gov.in ह्या संकेतथळार कागाळ दाखल करची.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
