भांगरभूंय | प्रतिनिधी
संवसारभरांतल्यान 8 हजारां वयर येतले प्रतिनिधी
भांगरभूंय । खबरां मेज
पणजीः गोंय आंतरराष्ट्रीय पर्पल फेस्त मनोवपाक सज्ज जालां. आयज 8 ते 13 जानेवारी मेरेन पुराय सप्तका खातीर गोंयांत तें आयोजीत जाता. गोंय राज्य दिव्यांगत्व आयुक्त कार्यालय हांणी आयोजीत केल्लें आनी गोंय राज्य समाज कल्याण संचालनालय, दिव्यांग व्यक्तीं सक्षमीकरण विभाग, केंद्रीय समाजीक न्याय आनी सक्षमीकरण मंत्रालयाच्या सहकार्यान ह्या महोत्सवाचो उक्तावण सुवाळो सोमारा 8 जानेवारीक सांजेच्या 4.30 वरांचेर दयानंद बांदोडकर मैदान, कांपाल-पणजे जातलो.
मुख्यमंत्री डॉ. प्रमोद सावंत आनी मानाचे सोयरे म्हूण केंद्रीय समाजीक न्याय आनी सक्षमीकरण राज्यमंत्री रामदास आठवले हाजीर आसतले. तशेंच खाशेल्या आमंत्रितां मदीं भलायकी मंत्री विश्वजीत राणे, केंद्रीय पर्यटन, बंदरां आनी उदकामार्ग राज्यमंत्री श्रीपाद नायक हाजीर आसतले.
हे कार्यावळीक समाज कल्याण मंत्री सुभाष फळदेसाय, राज्यसभा खासदार सदानंद तानावडे, मुख्य सचीव पुनीत कुमार गोयल, गोंय राज्य दिव्यांगत्व आयुक्त गुरूप्रसाद पावस्कार, राज्य अपंगूळ आयुक्त कार्यालय सचीव ताहा हाजीक आनी हेर मानेस्त हाजीर आसतले.
इंटरनॅशनल पर्पल फेस्ट-गोवा 2024 हे सर्तींत संवसारभरांतल्यान 8 हजारां परस चड प्रतिनिधी येवपाचे आसात. एकूणच हो महोत्सव विविधतायेचो आनी समावेशकतायेचो संवसारीक उत्सव आसतलो. दिव्यांग भुरगीं मनरिजवण, गायन आनी नाचाच्या सादरीकरणान आपली प्रतिभा दाखोवन उक्तावण सुवाळ्यांतल्यान रंग भरतलीं.
“पर्पल फेस्ता निमतान उमेदीचें वातावरण आसा. ह्या महोत्सवाक आमी सगळ्या थळाव्या आनी भायल्या प्रतिनिधींक येवकार दितात. पणजे आयोजीत केल्ली ही कार्यावळ अपंगत्व आशिल्ल्या लोकां वांगडा समावेशीपणाची परब मनोवपाचो हो एक खीण. सगळ्या सहभागी प्रतिनिधींक उमेदीन येवकार, अशें समाज कल्याण मंत्री सुभाष फळदेसाय हांणी म्हणलां.
गुरुप्रसाद पावस्कार हांणी म्हणलें, ही फक्त एक कार्यावळ न्हय, तर अपंगत्व आशिल्ल्या व्यक्तींच्या सक्षमीकरणा खातीर आनी समाजांत समावेशकताये खातीर एक सामुहीक यत्न. ह्या महोत्सवा वरवीं आमी समावेशकता, सुलभताय आनी खोलायेन जाणविकाय वाडोवपाची आस्त बाळगितात. उक्तावण सुवाळ्याची खाशेली गजाल म्हणल्यार ‘धमाल’ हें पर्पल गीत. ताचे संगीत दिग्दर्शक मन्नान शाह आसात. ह्या महोत्सवांत खास करून वेगवेगळ्या सक्षम लोकां खातीर पर्पल टीव्ही इंडियाचें अनावरण जातलें. अपंगत्व आशिल्ल्या लोकांक सक्षम करपा खातीर एक समावेशक माध्यम मंच दिवप, संवसारभरांतल्यान कल्पना, येसस्वी कथा, मुलाखती आनी तांच्यो येसस्वी कथा सादर करपाचो ह्या टीव्ही चॅनलाचो हेतू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
