भांगरभूंय | प्रतिनिधी
-8 ते 13 जानेवारी 2024 मजगतीं आयोजन
पणजीः दिव्यांगा खातीर म्हत्वाची माची थारिल्लो आंतरराष्ट्रीय पर्पल फेस्टीवल 8 ते 13 जानेवारी 2024 मजगतीं जातलो. ह्या फेस्ट खातीर वैयक्तीक तशेंच संस्था ह्या क्षेणींत प्रतिनिधींक मुफत नोंदणी करपाक मेळटली, अशी म्हायती गोंय राज्य दिव्यांगजन आयुक्त गुरूप्रसाद पावसकार हांणी दिली.
गोंय राज्य दिव्यांजन आयोग, गोंय राज्य समाज कल्याण संचालनालय आनी केंद्रीय समाज कल्याण आनी सबळीकरण मंत्रालया खाला येवपी दिव्यांगजन सबळीकरण विभाग हांच्या जोड पालवान महोत्सव आयोजीत केला. ह्या महोत्सवांत वांटेकार जावपाक नांवनोंदणी गरजेची आसून ते खातीर
http://www.purplefest.goa.gov.in/ या संकेतस्थळाक भेट दिवपाचें आवाहन केलां.
पर्पल फेस्ट आयोजना फाटल्या उद्देश म्हणल्यार सर्वसमावेशक आनी विविधता आपणावपी समाज निर्माण करप आसा. आंतरराष्ट्रीय पर्पल फेस्ट आयोजन समितीन भलायकी, शिक्षण, रोजगार, प्रवेशसुलभता आनी आपत्ती वेवस्थापन ह्या विशयांचेर केंद्रींत थींक टँक सत्रां आयोजीत केल्यात. ह्या क्षेत्रांत दिव्यांगांक सतावपी समस्ये विशीं जागृताय करप तशेंच सक्षम उपाय येवजण करप हो हेत आसा.
तशेंच वांटेकार जावप्यांक क्रूझ राइड्स, बर्ड ट्रेल्स, मुव्ही स्क्रिनींग, ड्रम सर्कल आनी स्टारगेझींग सेशन अशा मनरिजवणेच्या उपक्रमांचेर नियोजन केला, अशें पावसकार हांणी म्हणलें.
दिव्यांगांची जीण कशी आसता हाचे प्रात्यक्षीक पर्पल एक्स्पिरियन्स झोनांत दाखयतले. ह्या वेळार धोरणकर्ते, शासकीय कर्मचारी, शिक्षणीक संस्था आनी सामान्य प्रेक्षकांची उपस्थिती आसतली. तशेंच दिव्यांगा खातीर विवीध राष्ट्रीय आनी आंतरराष्ट्रीय पांवड्या वयल्या खेळां सर्तींचेय आयोजन करतले, अशी म्हायती आयुक्त पावसकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
