भांगरभूंय | प्रतिनिधी
पणजी: आंतरराष्ट्रीय नामनेचे शिल्पकार राम सुतार हांकां जाण्टेपणाक लागून मरण आयलें. पिरायेच्या १०१ व्या वर्सा तांणी निमाणो स्वास घेतलो. राम सुतार हांणी संवसारभर २०० परस चड शिल्पां तयार केल्यांत. हातुंतलेंच एक म्हणल्यार पर्तगाळे श्रीसंस्थान गोकर्ण जीवोत्तम मठाकडली तांणी तयार केल्ली ७७ फूट उंच श्रीरामाची मुर्ती. हालींच प्रधानमंत्री नरेंद्र मोदी हांचे हस्तुकीं तिचें लोकार्पण दाल्लें. तांच्या मार्गदर्शना खाला तांचे पूत अनिल सुतार हांणी ही मुर्ती तयार केल्ली. तशेंच दिल्लीच्या संसद भवनाच्या आंगणांत राम सुतार हांणी तयार केल्लीं जायतीं शिल्पां आसात.
पद्मश्री, महाराष्ट्र भूषण अश्या पुरस्कारांनी राम सुतार हांकां भोवमानीत केल्यात. कांय दिसां आदीं ताका महाराष्ट्र भूषण पुरस्कार फावो जाल्लो. मुख्यमंत्री देवेंद्र फडणवीस हांणी हॉस्पिटलांत वचून हो पुरस्कार भेटयलो. कांय दिसां आदीं अंदमानांत स्वतंत्रवीर सावरकर हांचे मुर्तीचें उक्तावण जालें. ही मूर्त राम सुतार हांणी तयार केल्ली. राम सुतार हांच्या पुतळ्यां मदली कलाकुसर, तांच्या शिल्पांतली बारीकसाण हें तांचे कलेचें विशिश्ट्य आशिल्लें. तांच्या वचपान कला मळार बरेंच व्हड लुकसाण जालां.
कोण आशिल्ले राम सुतार?
भारतांतले सगल्यांत अणभवी आनी नामनेचे शिल्पकार म्हणून प्रसिद्ध आशिल्ले राम वनाजी सुतार हांणी संवसारांतलो सगल्यांत उंच, १८२ मीटर उंचायेचो ‘स्टॅच्यू ऑफ युनिटी’ (सरदार पटेलांचो पुतळो) साकारिल्ले खातीर तांकां संवसारीक पांवड्यार वळख मेळ्ळी.
तांचो जल्म १९ फेब्रुवारी १९२५ दिसा धुळें जिल्ह्यांतल्या गोंडूर गांवांत जालो. सुरवातेक श्रीराम कृष्ण जोशी हांच्या मार्गदर्शनाखाला तांणी शिल्पकलेचें मुळावे धडे घेतले. उपरांत तांणी मुंबयचें जे. जे. स्कूल ऑफ आर्ट्समध्ये औपचारिक शिक्षण पुराय केलें.
१९५९ वर्सा राम सुतार हांणी दिल्लींत म्हायती आनी दुरसंचार मंत्रालयांत नोकरी स्वीकारली. मात कांय वर्सांचे सेवे उपरांत तांणी नोकरेचो राजिनामो दिवन पुराय वेळ शिल्पकार म्हणून काम करपाचो निर्णय घेतलो. शिल्पकलेंत दीर्घ अणभवाच्या नेटार तांणी दिल्लीक स्वताचो शिल्पकलेचो स्टुडिओ उबारलो.
राम सुतार हांणी आपले कारकिर्दीत खुबशे इतिहासीक आनी म्हत्वाचे पुतळे तयार केले. स्टॅच्यू ऑफ युनिटीचो पुराय डिजायन तांणी तयार केला, हें तांचे जिणेंतलें सगल्यांत व्हड आनी तोखणाय करपा सारकें काम मानतात. भारतीय कला आनी संस्कृती घडपांत तांचें योगदान सामकें मोलादीक आसा.
तांच्या कार्याची दखल घेवन १९९९ वर्सा पद्मश्री आनी २०१६ वर्सा पद्मभूषण पुरस्कारान तांकां भोवमानीत केले. सुमार ६० वर्सांचे कारकिर्दीत राम सुतार हांणी ५० परस चड भव्य मुर्ती निर्माण केल्यो. हातूंत संसद भवनांतली महात्मा गांधी हांचे मुर्तीचो विशेश उल्लेख करतात. हे मुर्तीच्यो प्रतिकृती इंग्लंड, फ्रान्स आनी रशिया ह्या देशांनीय धाडल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
