भांगरभूंय | प्रतिनिधी
चीनी वंशाच्या कझाकी नागरिका सयत तिगांक अटक
भांगरभूंय । प्रतिनिधी
पणजी : गोंय पुलिशेच्या सायबर विभागा कडल्यान आंतरराष्ट्रीय सायबर ‘जॉब स्कॅम’ उक्तडार हाडलो. मुख्य सुत्रधार आशिल्लो चीनी वंशाचो कझाकी नागरीक तलानिती नुलास्की हाका धरपाक विभागाक येस मेळ्ळें. तशेंच भारतीय नागरीक आशिल्लो आदित्य रविचंद्रन आनी रुपनारायण गुप्ता हाकाय अटक केली.
मजगतीं, तिसवाडी म्हालांतल्या एका पिडीत तरणाट्याची म्यानमारांतल्या फाटल्या फेब्रुवारींत सुटका केल्ली. ते उपरांत गोंय सायबर विभागान पिडीत तरणाट्याची जबानी घेवन ह्या प्रकरणाची चवकशी सुरू केली. थायलंडांतल्या एका कॉल सेंटरांत नोकरी आशिल्ल्याची जायरात इंस्टाग्रामाचेर उजवाडाक आयिल्ली. त्या जायरातदार एजंटान म्हयन्याक 60 हजार रुपया पगाराची नोकरी मेळटली, अशें सांगलें. ते उपरांत सगळी फाटपुरवण करून संबंदीत दुबावीत एजंटान पिडीत तरणाट्याक 14 जानेवारीक थायलंडाक व्हेलो. 15 जानेवारीक थंय पावले उपरांत दुसऱ्या दिसा ताका बोटींतल्यान म्यानमार व्हेलो. थंयच्या कॉल सेंटरांत व्हरून तांकां अमेरिकन नागरिकांक मोबायला वयल्यान चलयो आशिल्ल्याचें संदेश धाडून हनी ट्रॅपांत ओडपाक आनी पयशे गुंतोवपाक लावपाक सांगलें. ते उपरांत थंयच्या लश्करान त्यो कॉल सेंटरांतल्या पिडेस्तांची सुटका केल्ली. गोंयच्या सायबर गुन्यांव विभागान पिडिताचे चवकशे उपरांत तपास करून हो जॉब स्कॅम उक्तडार हाडलो. ह्या प्रकरणांत सायबर विभागाचे पुलीस अधिक्षक राहुल गुप्ता आनी उपअधिक्षक अक्षत आयुष हांच्या मार्गदर्शना खाला निरिक्षक दीपक पेडणेंकार हांच्या फुडारपणा खाला पंगडान कारवाय केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
