भांगरभूंय | प्रतिनिधी
पणजीः इझ्राएल आनी इराण हांचे मदलें झूज, अमेरिकेची राष्ट्रपती वेंचणूक आनी हेर आंतरराष्ट्रीय कार्यावळींक लागून भांगराचें मोल विक्रमी वाडलां. बिरेस्तारा जीएसटी सयत 10 ग्राम भांगराचें मोल 80 हजारां वयर आशिल्लें. जाल्यार 1 कील रुपें 1 लाख रुपया परस चड आशिल्लें. सणांच्या हंगामांत गिरायकांची मागणी वाडिल्ल्यान फुडल्या दिसांनी भांगराचे दर आनीक वाडपाची शक्यताय वेपाऱ्यांनी उक्तायल्या.
हे विशीं गोवा गोल्ड ज्वेलरी असोसिएशनाचे अध्यक्ष आनी आयबीजाचे राज्य अध्यक्ष समीर कुडतरकार हांणी सांगलें, आंतरराष्ट्रीय वेव्हार शांत जाय मेरेन भांगराचें मोल वाडपाची शक्यताय आसा. आंतरराष्ट्रीय पांवड्यारय भांगराची गुंतवणूक वाडल्या. देखून कांय दीस दर उणो करपाची शक्यताय ना. घडये फुडल्या काळांत धा ग्राम भांगर एक लाख रुपया मेरेन वचूंक शकता.
तांणी सांगलें, राज्यांत वेगवेगळ्या प्रकारचीं कॉर्पोरेट ज्वेलरी दुकानां सुरू जाल्यांत. पूण पारंपारीक भांगराकार दुकानांकय बरो प्रतिसाद मेळपाक लागला. आमी फकत हॉलमार्क केल्लें भांगर विकतात. ताचो दर्जो कॉर्पोरेट दागिन्यांत मेळपी भांगरा सारकोच आसता. कॉर्पोरेट दागिन्यांत प्रक्रिया शुल्क चड आसता. आमचे कडल्यान विकतें घेतिल्लें भांगर फुडें विकल्यार चड मोलाचें आसता. हाकाच लागून थळावे लोक आमकां पसंत करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
