भांगरभूंय | प्रतिनिधी
चडश्या क्लबांची मान्यताय : विपूल फडके हांची म्हायती
भांगरभूंय । प्रतिनिधी
पणजी : गोंय क्रिकेट असोसिएशना कडेन (जीसीए) संलग्न आशिल्ल्या चडश्या क्लबांनी धारगळे आंतरराष्ट्रीय क्रिकेट स्टेडियम बांदपाक मान्यताय दिल्या. ‘जीसीए’ कडल्यान लेगीत धारगळे स्टेडियम बांदपा खातीर गरजेचे ते परवाने घेतात, अशें ‘जीसीए’चे अध्यक्ष विपूल फडके हांणी आयतारा ‘भांगरभूंय’ कडेन उलयतना स्पश्ट केलें.
खेळां मंत्री गोविंद गावडे हांणी शेनवारा दिवचले एके कार्यावळी उपरांत उलयतना आंतरराष्ट्रीय क्रिकेट स्टेडियम बांदून ह्या वाठाराची उदरगत करपाचो सरकाराचो यत्न आसा, अशें म्हणिल्लें. पूण ‘जीसीए’च्या ह्या आदींच्या खूबश्या साबार बसकांनी क्लबांनी आंतरराष्ट्रीय क्रिकेट स्टेडियम धारगळेच बांदचे, अशी भुमिका मांडून काम सुरू करपाचो सल्लोय दिल्लो. पूण कांय परवाने अजून मेळूंक नाशिल्ल्यान ही प्रक्रिया फुडें वचूंक शकली ना, अशें फडके हांणी सांगलें. मजगतीं, शेखर साळकार ‘जीसीए’चे अध्यक्ष सतना भारतीय क्रिकेट नियामक मंडळान (बीसीसीआय) गोंयांत आंतरराष्ट्रीय क्रिकेट स्टेडियम बांदचे खातीर वन म्हावळींग्यां 40 कोटी रुपया खर्च करून जमीन घेतिल्ली. पूण ते उपरांतच्या काळांत धारगळे खेळांनगरी उबारचें नियोजन गोंय सरकारान केले उपरांत आंतरराष्ट्रीय क्रिकेट स्टेडियम थंय बांदपा संबंदांत चर्चा सुरू जाली.
धारगळेचीच सुवात योग्य
धारगळ वाठारांत आंतरराष्ट्रीय विमानतळ सुरू जालां. फुडारांत ह्या वाठारांत हॉटेलां येतलीं. तशेंच पर्वरेचो उड्डाण पूल पुराय जाले उपरांत धारगळ ते पणजी हें अंतर लेगीत उणें जातलें. ह्या सगळ्या गजालींचो विचार करूवन आंतरराष्ट्रीय क्रिकेट स्टेडियम धारगळे बांदप योग्य थारतलें, पूण स्टेडियम खंय बांदपाचो ताचो निर्णय पुराय तरेन क्लबांचेर निंबून आसतलो, अशेंय विपूल फडके हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
