भांगरभूंय | प्रतिनिधी
खबरां संस्था
डॉमनिकाः भारत- वेस्ट इंडिज हांचे मदले पयले टॅस्टीचो पयलो दीस स्पीनर आर आश्विनाच्या नांवार लागलो. ताणे टॅस्ट करिअरात डावांत 5 विकेटी घेवपाचो पराक्रम 33वे फावट करून दाखयलो. ताका लागून वेस्ट इंडिजाचो पयलो डाव 150 धांवड्यांत सोपलो. डावांत सगल्यांच चड फावट 5 वा ताच्या परस चड विकेटी घेवपी जेम्स एंडरसनाक आश्विनान फाटीं उडयलां.
आश्विनाच्यो आंतरराष्ट्रीय मळार 700 विकेटी पुराय जाल्यात. सगल्यांत चड 96 फावट बोल्ड करपी तो पयलो भारतीय बॉलर थारला. व्हो विक्रम अनिल कुंबळेच्या नांवार आशिल्लो. वेस्ट इंडिजाच्यो पांच विकेटी घेवपी आश्विनाच्यो आतां आंतरराष्ट्रीय मळार 702 विकेट जाल्यात. क्रिकेटीच्या तिनूय फॉर्मेटांत सगल्यांत चडल्यांत चड विकेटी घेतिल्ल्यांचे वळेरेंत आश्वीन 16वे सुवातेर पावला. दक्षीण आफ्रिकेचो फास्ट बॉलर डेल स्टेनाक (699) ताणे फाटीं उडयलां. भारताच्या अनिल कुंबळेन 956 आनी हजभजन सिंगान 711 विकेटी घेतल्यात. आश्वीन तांच्या फाटल्यान आसा.
आश्विनान 93 टॅस्टींच्या 33 डावांत 5 वा ताचे परस चड विकेटी घेतल्यात. हे बाबतींत ताणे इंग्लंडाचो फास्ट बॉलर जेम्स एंडरसनाक (32) फाटीं उडयला. सगल्यांत चड फावट पांच विकेटी घेवपाचो विक्रम श्रीलंकेच्या मुथैया मुरधीधऱन हाच्या नांवार आसा. ताणे 67 फावट ही कामगिरी केल्या. टॅस्ट मॅचींत बापूय- पुताची विकेट घेवपी आश्वीन पयलो भारतीय बॉलर थारला. ताणे वेस्ट इंडिजाच्या पयल्या डावांत ओपनर तेजनारायण चंद्रपॉल आनी ताचो बापूय शिवनारायण चंद्रपॉल हाची विकेट घेतली
जयस्वाल आनी रोहिताचे अर्द शेंकडे
खबरां संस्था
डॉमनिकाः पयले टॅस्ट मॅचींत वेस्ट इंडिजाक तांच्या पयल्या 150 धांवड्या गुठलायल्या उपरांत भारतीय पंगडान नाबाद 80 वयल्यान बुधवारच्या दुसऱ्या दिसा निमणी म्हायती मेळ्ळी तो मेरेन भारतान बिनबाद 133 धांवड्यो केलो. कॅप्टन रोहीत शर्मा वांगडा टॅस्ट पदार्पण कररी यशस्वी जयस्वालान वेस्ट इंडिजाच्या बॉलरांचेर हल्लाबोल करून 110 बॉलांत 7 चौक्यांनी पयल्या सत्रांत आपलो अर्द शेंकडो पुराय केलो. पयल्या सत्राचो खेळ सोपलो तेन्ना भारतान बिनवाद 117 धांवड्यो केल्लो. रोहीत शर्मा 4 चौके आनी 2 सक्यांनी 49 धांवड्यांचेर खेळटालो. उपहारा उपरांत रोहितान आपलो अर्दे शेंकडो पुराय केलो.
विंडसर पार्काचे खेळपट्टेर टॉस जिखून बॅटींग करपाचो निर्णय कॅप्टन क्रॅग ब्रेथवेटाक बरोच म्हारग पडलो. रविचंद्रन आश्वीन हाचे स्पीन बॉलिंगे सामकार वेस्ट इंडिजाचो डाव गडगडत गेलो. एकूय खेळगडो डाव साल्वार करपाक शकलो ना. टॅस्ट पदार्पण करपी एलीक एथनाजान केल्ल्या 47 धांवड्यांक लागून तांकां 150 धांवड्यां मेरेन पावन शक्य जाले. ब्रेथवेटान 20 आनी तेजनारायण चंद्रपॉलान 12 धांवड्यो केल्यो. आश्वीनान 5 आनी रवींद्र जडेजान 3 विकेटी घेतल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
