भांगरभूंय | प्रतिनिधी
कैरो, खबरां संस्था ः इजिप्तांत जावपी आंतरराश्ट्रीय लश्करी सरावांत भारतीय वायुसेनेचीं 5 मिग-29 झुजारी विमानां वांटो घेतात. 21 दिसांच्या तिनूय सैन्याच्या संयुक्त लश्करी सरावाक ‘ब्राइट स्टार’ अशें नांव दिलां. हांगा चलपी ह्या सरावांत मिग-29 सोडल्यार 6 येरादारी विमानां आनी 150 भारतीय खाशेल्या दळांतले कर्मचाऱ्यांनी वांटो घेतला.
भारत पयलेच खेपे ह्या त्रिसेवा सरावांत वांटो घेता. यजमान इजिप्त आनी भारता भायर अमेरिका, साउदी अरेबिया, ग्रीस आनी कतार हेय ह्या सरावांत वांटो घेतात. भारताच्या 2 आयएल-78, 2 सी-130 आनी 2 सी-17 विमानांचोय आस्पाव आसा अशी म्हायती वायुसेनेन दिल्या.
भारत आनी इजिप्त हांचे संबंद हालींच्या काळांत खूब घट जाल्यात. दोनूय देश एकठांय येवन एरो-इंजिन तयार करतात. हाचे वांगडाच भारतीय वायुसेना इजिप्तांतल्या पायलटांकय प्रशिक्षण दिता. भारत आनी इजिप्ताच्या सैन्यान अंदूं जानेवारींत पयलेच खेपे संयुक्त लश्करी सराव केलो. इजिप्तान भारतांतल्यान तेजस विमान आनी हेर लश्करी हेलिकॉप्टर विकतें घेवपाची इत्सा उक्तायल्या.
वायुसेनेन 15 ऑगस्टाच्या आदीं श्रीनगर हवाई तळाचेर मिग-29 झुजारी विमानांचें स्क्वाड्रनय तैनात केल्लें. डिफेंडर ऑफ द नॉर्थ नांवाच्या ह्या स्क्वाड्रनान मिग-21 झुजारी विमानांच्या स्क्वाड्रनाची सुवात घेतल्या.
श्रीनगर हवाई तळ चीन आनी पाकिस्तानाक लागीं आशिल्ल्यान हांगा मिग-29 विमानांची तैनाती करप म्हत्वाचें. पाकिस्तान आनी चीनाच्या धमक्यांक आतां हीं झुजारी विमानां जाप दितली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
