भांगरभूंय | प्रतिनिधी
खबरां संस्था ः इंटरनॅशनल कोर्ट ऑफ जस्टिसान (ICJ) शुक्रारा एक म्हत्वाची घोशणा केली आनी म्हणलें, इस्रायलान पॅलेस्टिनी क्षेत्रांचेर जायत्या दशकां सावन बेकायदेशीर ताबो केला तो बेगीन सोडपाक जाय. इस्रायलान 1967 त अरब देशांक हारोवन अस्तंत देग, उदेंत जेरुसलेम आनी गाझा पट्टी आपल्या ताब्यात घेतली. आयसीजेन ही टिप्पणी फकत ह्या वाठारां संबंदी केल्या.
इस्रायलान आपले सत्तेचो गैरवापर करून पॅलेस्टिनींचे हक्क काडून घेतल्यात अशें आयसीजेन सांगलें. तो आंतरराश्ट्रीय कायद्यांचे उल्लंघन करता. पॅलेस्टिनींना इतलीं वर्सां ह्या वाठारांनी राज्य केल्ल्याची भरपाय दिवची.
टाइम्स ऑफ इस्रायलाच्या खबरां प्रमाण, आयसीजेच्या ह्या निकालाक लागून वेस्ट बँकांत रावपी इस्रायल लोकां मदीं तिडक निर्माण जाली. तांणी अस्तंत देगेलागीं आशिल्ल्या बुरीन ह्या पॅलेस्टिनी गांवाक उजो लायलो. त्याच वेळार इस्रायलचे प्रधानमंत्री बेंजामिन नेतन्याहू हांणी हो निर्णय न्हयकारलो आनी ताका ‘फटीचो निर्णय’ अशें म्हणलें.
जेरुसलेम इस्रायलाचेंच : नेतन्याहू
आयसीजेच्या ह्या निकाला उपरांत प्रधानमंत्री नेतन्याहू हांणी एका निवेदनांत म्हणलें, ज्यू लोकांनी पॅलेस्टिनींच्या जमीनीचेर ताबो करुंक ना. ते रावतात ती जमीन तांचीच आसा. जेरुसलेम ही व्याप्त जमीन न्हय तर इस्रायलाची राजधानी आसा. आयज न्हय, ती सदांच इस्रायलची भूंय आसा.
आयसीजेचे 15 न्यायाधीश आसात, तातूंतल्या 11 न्यायाधीशांनी इस्रायल आड निकाल दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
