भांगरभूंय | प्रतिनिधी
इंटरपोल अधिकाऱ्यान दिली म्हायती
न्यूयाॅर्क, खबरां संस्था : एके वटेन संवसार रशिया- युक्रेन आनी इझ्रायल- हमासाच्या झुजांत घुस्पला, तर दुसरे वटेन आंतरराश्ट्रीय गुंड आनी संघटीत गुन्यांव नेटान वाडत आसात. ते सध्याचे परिस्थितीचो फायदो घेवन संवसारभर आपलो विस्तार करीत आसात. १० वर्सां आंतरराष्ट्रीय पुलीस संघटणा इंटरपोलच्या सरचिटणीस पदार आशिल्ले जर्गेन स्टॉक हांच्या दाव्या प्रमाण, गुंड टोळयो आनी संघटीत गुन्यांवां आड संवसार लढाय हारपाक लागला, हाचो आपल्याक भंय आसा. तांच्या तर्का प्रमाण, संघटीत गुन्यांवगारांच्या नेटवर्कांत अभूतपूर्व विस्तार पळोवपाक मेळ्ळा.
संवसारभर संघटीत गुन्यांवांचेर लक्ष दवरपी संस्था ट्रान्सेशनल ऑर्गनायज्ड क्रायमचे ग्लोबल इनिशिएटिव्हचे संचालक मार्क शॉ म्हणटात, इंटरनॅशनल गँगच्या विस्ताराची ३ मुखेल कारणां आसात. एन्क्रिप्टेड अॅप्स आनी क्रिप्टोकरन्सी सारकिल्ल्या तंत्रज्ञानान गुन्यांवकारांक एकमेकां कडेन जोडप आनी आपली कमाय संवसारभर अशे तरेन हस्तांतरीत करपाची सुविधा दिल्या. तशेंच सिंथेटीक ड्रर्जाक लागून संवसारीक टोळ्यांची व्हड कमाय जाता.
ह्या शेंकड्याच्या पयल्या २० वर्सांनी संवसारांत हत्येचें प्रमाण एक चतुर्थांशान उणें जालां. ह्या १ लाख लोकां फाटल्यान ६.९ वेल्यान देंवून ५.२ जाले. मात सायबर गुन्यांव वाडल्यात. चेनॉलिसीस ह्या डेटा कंपनीचो अदमास आसा की, ह्या वर्स अखेर मेरेन रॅन्समवेअर हल्ल्यांतल्यान बेकायदेशीर कमाय ७.६ अब्ज डॉलर मेरेन पावतली. ही रक्कम गुन्यांवकारी टोळयो आनी उत्तर कोरियाच्या १० हजार हॅकर्सां मदीं वाट्टले.
नवे ड्रग्ज येतात
सिंथेटीक ड्रग्साक लागून टोळयेचो नेटान विस्तार जालो. २०१३ आनी २०२२ मजगतीं दक्षीण-अस्तंत आशियेंत मेथॅम्फेटामायनची जप्ती चौपट वाडली. २०१० ते २०२० मजगतीं ड्रग्ज घेवपी लोक एक पंचमांश वाडले. नवे सिंथेटिक ड्रग्ज चड प्रभावकारी आसात. उदासरण फेंटॅनायल हेरॉइना परस ५० पट चड बळिश्ट आनी इटोनिटाझीन हेरॉयना परस ५०० पट चड खर आसा.
४० देशांत नेटवर्क, ६० हजार वांगडी
इटलीच्या कॅलाब्रियाचो माफिया अँन्ड्रागेटाच्या आदीं सावन कॅनडा, ऑस्ट्रेलिया आनी पश्चीम युरोपांत फांटे आसात. अँन्ड्रागेटाचे नेटवर्क ४० देशांत विस्तारल्यात. तांची उलाढाल ५० अब्ज डॉलर आसात.
ब्राझिलांतली सगळ्यांत व्हड टोळी फर्स्ट कॅपिटल कमांड, गुन्यांवकारी बाजाराच्या नेमांक संस्थेच्या रूपांत काम करता. साओ पावलो युनिव्हर्सिटीचे ब्रुनो पेस मानसो हांणी सांगलें, ही टोळी संघर्श उणो करपा खातीर नेम तयार करता. २६ देशांनी ६० हजार वांगडी आसात.
अल्बानियाची गुन्यांवकारी टोळी ही ग्लोबल जाल्या. संवसारांतले २ सगळ्यांत व्हड कोकेन उत्पादक देश कोलंबिया आनी पेरू बगर इक्वेडोरचो अंडर वर्ल्डूय अल्बानियन गँगस्टर्स वांगडा आसा.
कोलंबियन बंडखोर टोळी फार्क कोलंबियाच्या ग्वायकिल पोर्टवेल्यान युरोप आनी अमेरिकेक वचपी कोकेनची खेप नियंत्रीत करताली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
