भांगरभूंय | प्रतिनिधी
भांगरभूंय । प्रतिनिधी
पणजीः कदंबा बशींतल्यान सोऱ्याची तस्करी जावची न्हय हे खातीर म्हामंडळान उपाय येवजण आंखतात. हाचोच एक भाग म्हूण आंतरराज्य मार्गांचेर कदंबा बस चलोवपी चालक तशेंच कंडक्टरांची दरेका म्हयन्यांत बदली करतले. म्हामंडळाचे अध्यक्ष आमदार उल्हास नायक तुयेंकार हांणी ही म्हायती दिली. हे विशां म्हामंडळाच्या वेवस्थापकीय संचालकांक सुचोवणी दिल्ल्याचें तांणी स्पश्ट केलें.
तेलंगणांत सांपडिल्लो चालक आनी कंडक्टराक म्हामंडळान सेवेंतल्यान निलंबीत केल्यात. आंतरराज्य बस सेवेंत चालक वा कंडक्टर खूब वर्सां एकाच मार्गार वतात. ताका लागून तांकां दुसऱ्या राज्यांनी स्वताच्यो वळखी वाडोवप सोंपें जाता. हाकाच सागून मागीर सोऱ्याची तस्करी करपा सारकीं प्रकरणां घडटात. हें आडावपा खातीर चालक आनी कंडक्टराची एकसारकी बदली करप गरजेचें आसा, अशें तुयेंकार हांणी सांगलें.
गोंयांतल्या तपासणी नाक्यांचेर कदंबा बशींची तपासणी जावप गरजेचें आसा. मात थळावी बस आशिल्ल्यान तांची तपासणी करिनात. हे मुखार म्हामंडळाचे तपासणी अधिकारी अश्या बशींची अचकीत तपासणी करतले, अशें तुयेंकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
