भांगरभूंय | प्रतिनिधी
बरेच खेपो विद्यार्थ्यांक आमी तांच्या फुडाराच्या गजाली सागंतात. तो विद्यार्थीय आयकता. ताका खूब कितें करीनशें दिसता. पूण अर्थीक कारणांक लागून नाजाल्यार आनीक कसल्या कारणाक लागून तो हें करपाक पावना. कोणें तरी म्हणलां, भारतान इतली उदरगत केल्या, पूण नोबेल खंय मेळ्ळां तर ते विज्ञानाच्या मळाचेर. आमच्या विद्यार्थ्यां मदीं हुशारी आसा, पूणय तांकां आर्थीक बाजू फाटीं ओडटा. मागीर इत्सा नासतना शिक्षण सोडून पोट भरपाक नोकरी करची पडटा. दुसऱ्या देशांत तो वता खरो, पूण ताचे दोळे भारताचेर आसता. 2014 सावन मात हें चित्र पुराय बदलपाक लागलां. पयलेच खेप बिगर व्याजाच्यो अर्थीक मजत करपी येवजण्यो आयल्यो.
ल्हानपणाचेर विद्यार्थी स्वताक घडोवपाक शकता. हें ताचें सपन पुराय करपाक अर्थीक मजत जाय, हें मतींत दवरून केंद्र सरकारान एक येवजण आंखल्या. ताचे नांव आसा, अटर टिक्चरींग प्रयोगशाळा. ज्यो शाळांनी आसतात. बऱ्याच शाळांनी ताचो लाव आपल्या विद्यार्थ्यां खातीर घेतला. गोंयांतूय असल्यो शाळा आसात. पूण तांचो आंकडो खूब उणो. ती वाडपाक जाय. सुरवातीकूच प्रयोगशाळा सुरू करतकच तुमच्या हातांत येतात 10 लाख. कल्पना अशी आसा की विद्यार्थ्यां मदीं उमळशीक ही आसूंक जाय. म्हाका याद जाता, डाॅ. रघुनाथ माशेलकार हे मुंबय शिकपाक आशिल्ले. तेन्ना तांच्या शाळेंतल्यान भावे नांवाच्या विज्ञान शिक्षकान सुर्याचें किरण कापूस कसो लासता हें एके कवचेचे मजतीन दाखयिल्लें. उपरांत तांणी सांगलें, तुमचें लक्ष आनी लक्ष्य एकेच गजालीचेर दवरश्यात तर यश धांवून येतलें.
उमळशीक (कुतुहूल) हें मनशा भितर जल्मा सावनूच आसता. शिक्षणा वांगडा वाचन वाडलें, वातावरण तशें मेळ्ळें जाल्यार ही गजाल शाळेचे शिक्षक वाडोवपाचें काम करतात. विज्ञान फांट्याच्या विद्यार्थ्यांक तर तो चड अणभव मेळटा. कित्याक तर ह्या फांट्यांत चडशें प्रात्यक्षीक आसता. विद्यार्थ्यांक ती गजाल मांडची पडटा, हें मतींत दवरून अटल टिंक्चरींग लॅब ही येवजण 2016 त केंद्र सरकारान चालीक लायल्या. विद्यार्थ्यां मदली संकल्पना, संशोधन, समस्या सोडोवपाची तांक वाडप हो तिचो मुखेल उद्देश. खंयचोय क्लब सुरू जालो काय तुमचे सृजनशिलतेक (क्रिएटीव्हीटी) बळगें मेळटा. नवे प्रयोग करपाक मेळटात. ही तांक वाडयली जाल्यार तुमी तुमच्या सरभोंवतणच्यो समस्या सोडोवपाक शकतात. आपल्या गांवांत सर्ग निर्माण करपाक शकतात.
तंत्रज्ञानांत आतां दर खिणाक बदल जातात. कोडींग, रोबोटिक विशय गोंयांत पावले. धावे यत्ते मेरेन ते सुरू करपी गोंय हें पयलें राज्य. ह्या अटल क्लबा वरवीं ह्या तंत्रज्ञानाची तशेंच नव्या तंत्रज्ञानाची वळख जावंक जाय. विज्ञान, तंत्रज्ञान, अभियांत्रिकी आनी गणित हाका स्टेम म्हणटात. तांकां लेगीत तें वेवस्थित समजता. विद्यार्थी नव्यो कुशळटायो शिकता, हातूंतल्यान ताचो आत्मविस्वास वाडटा. निती आयोगाचो हो क्लब देशभर काम करता. अंदुंच्या बजेटांत असले पांच हजार क्लब सुरू करपाचें मोदी सरकारान थारायलां. आतां मेरेन असले धा हजार क्लब सुरू जाल्यात. सध्या एआयची चर्चा चलता. ताची म्हायती ह्या क्लबांनी मेळपाक शकता. केंद्र सरकारान शेंकड्यांनी तज्ञ नेमल्यात. तांकां तुमचे शाळेंत आपयात. स्वता भितरली उमळशीक जागी करपाक विद्यार्थ्यांक हो क्लब उपेगी पडटलो. संगणक शिक्षक आनी तंत्रज्ञानाची आवड, गिन्यान आशिल्ल्या शिक्षकांक जरुर आपोवचे. गोंयां खातीर डाॅ. मोहिनी नायक (98235 09033) हांचे कडेन संपर्क केल्यार, चड म्हायती मेळटली. ही येवजण विद्यार्थ्यां खातीर आसा, हें मतींत दवरात. चडश्या शाळा, उच्च माध्यमीक विद्यालयां खातीर ताचो उपेग जाता.
केन्ना- केन्ना येवजण सुरू जाता, बंद पडटा, ताचे फाटलें कारण कळना. पूण म्हायती घेवपाक पयशे पडनात, तुमी ती जरुर घेवची. आयज प्रत्येक विद्यार्थ्या कडेन मोबायल फोन आसा. ताचो शिक्षणीक वापर करचो. जसो की तुमचो पोर्ट्फोलियो बरो करपाक शिकात. तुमचो स्वताचो युट्यूब सुरू करात. ब्लाॅग करता, एखादे काॅलेज कार्यावळींत मनासावन वांटो घेयात. फुकट कोर्स करपाचे नदरेन विचार करात. कोर्सेरा सारक्याची मजत घेवपाक तुमकां सदांच साॅफ्ट स्कीलाची गरज लागतली. तेन्ना वेळ फुकट घालोवं नाकात. हालींच वास्को पालिकेक एक अॅप मेळ्ळा. ताचेर तुमच्या वाठारांतल्यो समस्या कितें आसा, तें सांगपाक मेळटलें. अशे प्रयोग तुमी करपाक शकतात. हालींच केंद्र सरकारान तरणाट्यां खातीर लागीं लागीं देड कोटी नोकऱ्यांची एक येवजण आंखल्या. ती मेळोवपाक तुमकां तुमचे कुशळटायेचो फायदो जातलो.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
