भांगरभूंय | प्रतिनिधी
सयेक लागून स्थलांतरणाचो आडखळ्ळा आदेश
भांगरभूंय । प्रतिनिधी
फोंडें: तामसडो- धांरबांदोडेंची आंगणवाडी स्थलांतर करपाचो शिक्षण खात्या कडल्यान आदेश येवंक नाशिल्ल्यान पालिकांची नाराजी वाडल्या. आंगणवाडयेंत जमीन तविल्ल्यान (ओली जाल्ल्यान) 6 ऑगस्टाच्यान पालकांनी भुरग्यांक आंगणवाडी केंद्रांत धाडपाचें बंद केलां. लागसारच्या सरकारी मुळावे शाळेंत आंगणवाडी केंद्र स्थलांतर करचे खातीर महिला आनी बाल कल्याण खात्यान शिक्षण खात्या कडेन परवानगी मागिल्ली. पूण अजून मेरेन शिक्षण खात्या कडल्यान आंगणवाडी स्थलांतर करपाचो आदेश येवंक नाशिल्ल्यान शिक्षण मंत्री डॉ. प्रमोद सावंत हांणी स्वता लक्ष दिवचें, अशी मागणी पालकांनी केल्या.
ह्या आंगणवाडी केंद्रांत वाठारांतली सुमार 25 भुरगीं येतालीं. भाड्याचे कुडींत चाल आशिल्ले आंगणवाडी केंद्रांतली जमीन तवल्या. हे खातीर पालकांनी भुरग्यांक हेर कडेन स्थलांतरीत करपाची मागणी केल्ली. पालकांनी बहिश्कार घातिल्ल्याची दखल धारबांदोडें म्हालाचे उपजिल्होधिकारी निलेश धायगोडकार हांणी थळावे सरपंच, सगळ्या संबंदीत अधिकाऱ्यांची आनी पालकांची बसका घेवन आंगणवाडी लागसारचे सरकारी मुळावे शाळेंत स्थलांतरीत करपाचो निर्णय घेतिल्लो. पूण अजून मेरेन शिक्षण खात्या कडल्यान आंगणवाडी ते शाळेंत स्थलांतरीत करपाचो आदेश दिवंक ना. मंत्री डॉ. सावंत हांणी तत्काळ आदेश दिवचो, अशी मागणी पालकांनी केल्या. सुत्रां कडल्यान मेळिल्ले म्हायती प्रमाण शिक्षण खात्याच्या अधिकाऱ्यांनी ती फायल शिक्षण मंत्री तशेंच मुख्यमंत्री डॉ. सावंत हांच्या कार्यालयांत फाटल्या 10- 12 दिसां आदीं धाडल्या. पूण अजून मेरेन फायलीचेर सय करूंक नाशिल्ल्यान स्थलांतराचो आदेश आडावन उरला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
