भांगरभूंय | प्रतिनिधी
म्हजें मत
केंद्रांतलें भाजपा आघाडी सरकार कामगार आनी शेतकार संबंदीत एक विधेयक संमत करता. ताका विरोध म्हूण गोंयांत कामगार संघटनांनी बंद आयोजीत केल्लो. आझाद मैदानाचेर व्हडली सभा जाली. आयटक फुडारी क्रिस्तोफर फोन्सेका, प्रसन्न उटगी, सुहास नाईक ह्या फुडाऱ्यांनी मोर्चाचें फुडारपण केलें. देशांत आनी गोंयांत कामगारांची जी पिळवणूक चल्ल्या, ताचे विरोधांत हो आक्रोश आशिल्लो. देशांत कामगार विरोधी कायदे हाडप सुरू आसा. ताच्या आड हो आक्रोश. हे कायदे पळयल्यार ‘भिवपाची गरज आसा’ असो ह्या आंदोलनांतल्या फुडाऱ्यांचो सूर आशिल्लो.
गोंयांतल्या आंगणवाडी कर्मचाऱ्यांक कमी पगार मेळटा. खरें तर आंगणवाडी म्हणजे सरकारी नर्सरी स्कूल. पूर्व प्राथमीक विद्यार्थी आंगणवाडींत शिकपाक येतात. मुळावें शिक्षण हे दर्जेदार आनी बऱ्या वातावरणांत दिवपाक जाय. पूण आमचे कडेन ह्या आनी प्राथमीक शिक्षणाची अवस्था पळयली जाल्यार रडपाक येता. गोठ्यांत गोरवां दवरचीं तशें आमचे कडेन शालेय वातावरण आसता. ल्हान पिरायेचेर भुरग्यांक वळण लावपी आनी शिक्षणाची गोडी निर्माण करपी आंगडवाडी ताईच जर असलें जिणें जगता जाल्यार ती आनीक कसले धडे दितली? मुळावें शिक्षण ही फुडाराच्या उच्च शिक्षणाची बुन्याद आसता. तो जर असो तर फुडल्या शिक्षणाची इमारत ताचेर कशी उबी रावतली?
गोंयचे पयले मुख्यमंत्री भाऊसायब बांदोडकार हांची अशा वेळार याद येता. निर्माण केल्ल्यो शाळा वाडोवप सोडाच, त्यो तिगोवन दवरप सरकाराक शक्य जावंक ना. मुळाव्या शिक्षणाची दुर्दशा ना करपाक आंगणवाडी कर्मचाऱ्यां वयलो अन्याय पयलीं पयस करपाची गरज आसा. सरकारान ते खातीर फुडाकार घेवचो.
– गजानन बा. नायक भाटकार
शिवकृपा – आल्त पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
