भांगरभूंय | प्रतिनिधी
तिरुवनंतपुरम, खबरां संस्था ः आंकवार क्रिस्तांव चलयेक आपल्या बापाय कडल्यान पोटगी घेवंक मेळना असो निकाल केरळ उच्च न्यायालयान शुक्रारा दिलो. क्रिस्तांव वैयक्तीक कायद्यांत हाची तरतूद ना. पूण मुसलमान वैयक्तीक कायदो आनी हिंदू दत्तक आनी देखरेख कायदो (HAMA) खाला असो हक्क अस्तित्वांत आसा अशें न्यायालयान स्पश्ट सांगलें.
सविस्तर प्रकरण
ह्या प्रकरणांत 65 वर्सां पिरायेच्या क्रिस्तांव दादल्यान दाखल केल्ले याचिकेक कुटुंब न्यायालयाच्या आदेशाक आव्हान दिल्ले. तातूंत तांणे आपल्या विभक्त बायलेक म्हयन्याक 20 हजार रुपया आनी 27 वर्सां पिरायेच्या आंकवार चलयेक म्हयन्याक 10 हजार रुपया भरपाय दिवपाचे निर्देश दिल्ले.
याचिकादारान युक्तिवाद केलो की, याचिका वेळार आपली धूव प्रौढ आशिल्ली आनी देखून ती पोटगी मेळपाक पात्र ना. तशेंच ताची बायल ताका सोडून गेली आनी अर्थीक नदरेन ती सक्षम आसा अशेंय ताणें सांगलें.
उच्च न्यायालय पोटगीक स्थगिती दिली
उच्च न्यायालयान याचिकेक अंशतः परवानगी दितनाच चलयेक म्हयन्याक 10 हजार रुपया भरणपोशण दिवपाचो आदेश कुशीक काडलो. चली प्रौढ आसल्यार शारिरीक वा मानसीक नदरेन स्वताचे पालनपोशण करपाक असमर्थ आसल्यारूच ती पोटगी मागूं शकता अशें न्यायालयान म्हणलें.
HAMA आनी मुसलमान वैयक्तीक कायद्याच्या कलम 20 (3) खाला आंकवार चलयेक तिच्या बापायन सांबाळपाक जाय, पूण क्रिस्तांव वैयक्तीक कायद्यांत अशी तरतूद ना अशें न्यायालयान सांगलें. देखून कुटुंब न्यायालयाचो निर्णय योग्य नाशिल्लो.
सुनावणे वेळार घरकान्नीन सांगलें, ती तिच्या दुयेंत पुताच्या शिक्षण आनी उपचारा खातीर मुंबय रावता. उच्च न्यायालयान हें वाजवी अशें मान्य करून आवयची पालकत्वाची जापसालदारकी तिच्या वैवाहिक जापसालदारके परस चड आसता अशें सांगलें.
घरकान्नीक दर म्हयन्याक 20 हजार रुपया भरणपोशण आनी पुताच्या शिक्षणाक 30 हजार रुपया दिवपाच्या आदेशांत उच्च न्यायालयान बदल करुंक ना.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
