आंकड्या परस दर्जो म्हत्वाचो

भांगरभूंय | प्रतिनिधी

चड भुरगीं जल्माक घालचे परस आसात त्या भुरग्यांक सगल्या अर्थान तंदुरुस्त करप आमकां शक्य ना?

ल्हान कुटुंबांक लागून गोंयची अर्थीक, समाजीक उदरगत जाल्या हें न्हयकारपाक मेळचें ना. दरेका कुटुंबांत एक वा दोन भुरगीं आशिल्ल्यान गोंयकार सुखवस्तू आसा. पात्रांव ह्या किताबाक खऱ्या अर्थान बरींच कुटुंबां पात्र आसात, अशें म्हणल्यार तें चुकीचें थारचें ना. मात, भायल्यांचो आंकडो वाडिल्ल्यान 2030 मेरेन नीज गोंयकार उणें आनी भायल्यान येवन हांगा स्थायीक जाल्ले (15 वर्सां उपरांत तांकांय गोंयकार मानतात.) चड जातले, हातूंत दुबाव ना. काळ बदलता तशी समाजीक स्थितीय बदलता, ती आडावप शक्य नासता. हाचेर गोंयकारांनी चड भुरगीं जल्माक घालचीं, असो युक्तीवाद कोणूय करूंक शकता. आंध्रांतल्या तेलगू देसम पक्षाचे खासदार कालिसेट्टी अप्पलानायडू हांणी तशी घोशणा केल्या. अर्थांत आपल्या राज्या खातीर. तिसरें भुरगें जल्माक घाल्यार भेटवस्त दितले! चली जाल्यार 50 हजार रुपया. (हे पयशे खंय ते आपल्या पगारांतल्यान दितले.) चलो जाल्यार गाय. आंध्र प्रदेशांत खंय तरणाट्यांचो आंकडो उणो जाला, ताका लागून तांणी ही येवजण जाहीर केल्या. पक्षाच्या सगल्या लोकप्रतिनिधींनी ही घोशणा ‘क्रांतीकारी’ अशें म्हणलां. युती पक्ष भाजपाची अजून प्रतिक्रिया येवंक ना. विशेश म्हणल्यार मुख्यमंत्री चंद्रबाबू नायडू हांणी कालिसेट्टी हांचेर तोखणायेचो शिंवर केला. कितल्याय भुरग्यांक जल्माक घालें जाल्यार बायल कर्मचाऱ्यांक दर खेपे बाळंतपणाची रजा दितले. तरणाट्यांचो आंकडो वाडचो म्हूण बायलांनी शक्य तितल्या भुरग्यांक जल्म दिवचो, असो उलो नायडू हांणी मारला. ही सगली ‘करमणूक’ जाली, तो दीस खंयचो तर आंतरराष्ट्रीय महिला दीस!!
कालीसेट्टी आनी नायडू हांच्या ह्या घोशणांचेर हांसचें कांय रडचें तेंच कळना जालां. हें आवाहन राज्यांतल्या सगल्या लोकांक केलां, म्हणटकच हातूंत धर्मा वयल्यान भेदभाव जावचो ना. हरशीं अमूक धर्माच्या लोकांच्यो चार- चार बायलो आसतात, 8- 10 भुरगीं आसतात, असो बोवाळ फाटलीं बरींच वर्सां चल्ला. तो आतां बंद जातलो तर?
केंद्राच्या ‘युथ इन इंडिया’ अहवाला प्रमाण 2036 मेरेन देशांत फक्त 34.55 कोटी तरणाटे उरतले. जे सद्या वट्ट लोकसंख्येच्या 47 टक्के आसात. सध्या 15 ते 25 वर्सां पिराय गटांतले 25 कोटी तरणाटे आसात. फुडल्या 15 वर्सांत हो आंकडो देंवतलो. ‘इंडिया एजिंग’ अहवाला प्रमाण, 2011 त तरणाटे लोकसंख्येची पिराय 24 वर्सां आशिल्ली. आतां ती 29 वर्सां आसा.
जाण्ट्यांची संख्या 2036 त 12.5 टक्के, 2050 वर्सा 19.4 टक्के, तर 2100 मेरेन 36 टक्के जातली. म्हणटकच तरणाटे उणें जावन जाण्टे वाडटले. ताका लागून नोकरी, वेवसाय करप्यांचो आंकडो देंवतलो आनी देशाक लुकसाण जातलें. नायडू अशें उलयल्यात, तर ते वटेन तमिळनाडूचे मुख्यमंत्री स्टॅलीन हे 16 भुरगीं आसचीं हे तमीळ म्हणी कडेन वच्चें अशें उलोवन गेल्यात. थोडक्यांत सगल्यांनीच संघाची विचारसरणी स्विकारल्या, अशें दिसता. कारण तांणीय कांय वर्सां पयलीं हिंदू बायलांनी चड भुरगीं जल्माक घालचीं, अशें आवाहन केल्लें. नायडू हांणीय फाटीं दिल्लींत दक्षीण भारतांतली तरणाटी लोकसंख्या उणी जाता, असो हुस्को उक्तायिल्लो. सध्या आमची लोकसंख्या संवसारांत पयल्या क्रमांकाचेर आसा. 1 अब्ज 46 कोटी. ते वटेन चीन 1 अब्ज 41 कोटींचेर थीर जाला. तांची लोकसंख्या देंवपाक लागल्या. ‘ल्हान घराबो, सुखी घराबो’ अशें आमी म्हणटात, ताका 50 वर्सां जायत आयलीं. आतां ही घोशणा ‘व्हड देश, व्हड कुटुंब’ अशी बदलची पडटली.
चड भुरगीं जल्माक घालचे परस आसात त्या भुरग्यांक सगल्या अर्थान तंदुरुस्त करप आमकां शक्य ना? चली, चलो असो भेदभाव पयलीं बंद जावंक जाय. सगल्या भुरग्यांक दर्जेदार भलायकी सेवा, बऱ्यांतलें बरें शिक्षण मेळूंक जाय. तेंय बी सवाय भितर. तांकां तांचे आवडी प्रमाण रोजगार मेळचो. नोकरी उणीच 30 हजार पगाराची. वेवसाय, धंदो सुरू करपाक तांकां प्रत्यक्ष मजत मेळची. म्हालाक बाजारपेठ मेळची. बारीकसाणेन पळयल्यार आयज चड भुरगीं आशिल्लीं कुटुंबां गरिबींत जगतात. तांकां फावोशें शिक्षण मेळना. देखून प्रत्येकान घराबो ल्हान दवरूंक जाय. म्हणटकच ताची सर्वांगी उदरगत जातली. राज्य, पर्यायान देश वयर सरतलो. आयज उठसूठ सगलेच भायर धांवतात. हाचे फाटलें कारण, आमचे परस ते देश विकसीत आसात. लोक नोकरे खातीर वतात, ते हांगाच्या परस चड पगार मेळटा म्हूण. खंतीची गजाल म्हणल्यार हातूंतले चडशे भारतीय परतून येनात. आयलेच जाल्यार जाण्टेपणार. एकलोय राज्य, देश सोडून वच्चो ना, हे खातीर येवजण्यो आंखच्यो. दरेका शेतकाराक गाय दिवची, प्रत्येक भुरग्याच्या शिक्षणाचेर वर्साक 20 हजार रुपया मोडचे. बायलांक स्वावलंबी करपाक वावुरचें. अपघात, गुन्यांव उणें जावचे म्हूण उपाय घेवचे. लोकसंख्या पयलीं एक अब्जाचेर हाडुया. मागीर जाय जाल्यार चड भुरगीं जल्माक घालुया.