भांगरभूंय | प्रतिनिधी
पणजी : अखिल भारतीय कोंकणी परिशदेच्या साबार मंडळाची बसका फाल्यां शेनवार, 11 ऑक्टोबराक दनपरां साडेतीनाक विद्यानगर- मडगांवच्या कोंकणी भाशा मंडळ, कोंकणी भवनांत जातली. परिशदेची पुनर्नोंदणी करतना आयिल्ल्या अडचणींचेर हे बसकेंत निर्णय जातलो. 26 वें साहित्य संमेलन 22 आनी 23 नोव्हेंबराक केरळांतल्या एर्णाकुळमांत जातलें. साहित्य संमेलना खातीर वेंचिल्ली येवकार समिती साबार मंडळाचे बसकेंत मानून घेतले आनी संमेलनाच्या अध्यक्षाची वेंचणूक जातली. 3.30 वरांचेर जर कोरम जालो ना जाल्यार बसका, थारिल्ल्या वेळाच्या अर्द वरा उपरांत म्हणल्यार 4 वरांचेर सुरू जातली.
मजगतीं, 11 ऑक्टोबराक जावपी साबार बसके वेळार संमेलनाच्या अध्यक्षाची निवड जातली. ते खातीर, परिशदे कडेन जोडिल्ल्या संस्थांनी कोंकणी ज्येश्ठ साहित्यिकांचें ज्येश्ठत्व आनी श्रेश्ठत्व मतींत दवरून अध्यक्षपदाक सोबशीं नांवां काडून तीं साबार बसकेक येतना हाडचीं अशी विनवणी परिशदेची सरकार्यदर्शी स्नेहा सबनीस हांणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
