अ. भा. कोंकणी परिशदेचें फाल्यां उक्तावण

भांगरभूंय | प्रतिनिधी

भांगरभूंय । खबरां मेज

पणजीः अखील भारतीय कोंकणी परिशदेचें 33 वें अधिवेशन 26 आनी 27 ऑक्टोबराक मडगांवच्या रवीन्द्र भवनांत कोंकणी भाशा मंडळा वतीन आयोजीत केलां. शेनवारा 26 ऑक्टोबराक सकाळीं 9.30 वरांचेर अधिवेशनाचें उक्तावण जातलें. ह्या सुवाळ्याक नामनेचे भाशातज्ञ डॉ. गणेश देवी मुखेल सोयरे म्हूण जाल्यार मानाचे सोयरे म्हूण मंगळुरूच्या विश्व कोंकणी केंद्राचे अध्यक्ष नंदगोपाळ शेणय हाजीर रावतले. आयतारा 27 ऑक्टोबराक दनपराच्या 3.30 वरांचेर समारोप सुवाळो जातलो.  ह्या सुवाळ्याक नामनेचे उद्देगपती अवधूत तिंबलो हे मुखेल सोयरे म्हूण हाजीर रावतले.

ज्येश्ठ वावुरपी फा. मोउजीञु द आताईद हांची हाचे आदींच परिशदेचे अध्यक्ष म्हूण जाल्यार प्रशांत नायक हांची येवकार अध्यक्ष म्हूण निवड जाहीर जाल्या. अधिवेशनाच्या येसस्वी आयोजना खातीर विवीध समित्यो घडयल्यात.

अधिवेशनाक केरळ, कर्नाटक, गोंय आनी महाराष्ट्रांतल्यान 800 प्रतिनिधी हाजीर रावपाचे आसात. चारूय राज्यांतल्यान तरणाटे प्रतिनिधी हाजीर रावचे म्हूण अधिवेशनाच्या जाळवणदारांनी विंगड विंगड सुवातींनी भेटी दिवन कोंकणी संस्था आनी वावुरप्यां वांगडा बसका घेतल्यात.

अधिवेशनांत साबार विशयांचेर परिसंवाद घडून येतले. तातूंत ‘राष्ट्रीय शिक्षण धोरण आनी कोंकणी भास- आव्हानां आनी उपाय’ ह्या परिसंवादांत नारायण देसाय, पांडुरंग नाडकर्णी, जुझे रिबेलो, एस सुधीश शेणय, कस्तुरी मोहन पै, ‘शासन आनी लोकप्रशासनांत राजभाशेचें म्हत्व’ ह्या परिसंवादांत प्रकाश वझरीकार, संदेश प्रभुदेसाय, अनील सावंत, युगांक नायक, ‘भाशीक अल्पसंख्यांक- स्थिती आनी फुडार’ ह्या परिसंवादांत विलियम पायस, कृष्णकुमार के एस, लुईस रॉड्रिग्स, राकेश मिनेझीस, उषा राणे, आल्फी मोंतेरो, ‘कोंकणी भाशेक तंत्रज्ञानाची जोड’ ह्या परिसंवादांत गुरू बाळिगा, पलाश अग्नी, रत्नमाला दिवकार, स्टेनी बेळा, संजय राजगोपाल, ‘कोंकणी अस्मिताय आनी अस्तित्वाचे प्रस्न: मुखा वयली दिशा’ ह्या परिसंवादांत प्रकाश नायक, चंद्राबाबू शेट्टी, बेनिता डायस, हेन्री मेंडोन्सा, सेराफीन कॉता, संदेश बांदेकार आपले विचार मांडटले.

हाचे भायर साहित्य सादरीकरणाचीं दोन सत्रां जातलीं. तातूंत पयल्या सत्रांत तुकाराम शेट, कुमूद नायक, उदय गांवकार, निलबा खांडेकार, जुझे लॉरेन्स, पुर्णानंद च्यारी, ग्वादालूप डायस, रामनाथ गावडे, वसंत सावंत, संजय तलवडकार, अँथनी मिनेझीस, रामानंद प्रभू, टायटस नॉरोन्हा, वल्ली क्वाद्रूश, रोझारियो पिन्टो, सोनिया शिरसाट, खगेंद्र हेगडे देसाय जाल्यार दुसऱ्या सत्रांत जयेश राऊत, सोयरू वेळीप, सुभाष जाण, इंद्रजीत घुले, बाळकृष्ण मल्ल्या, विजयकुमार पै, जयप्रभू कांबळी, विल्सन कटील, आकृती नायक, जेनेट वाझ, सलोमी मियापदावू, प्रसाद पांगम, संगिता नायक, उर्वशी नायक, संजय कोमरपंत, ह्रषीकेश कदम, गोरख शिरसाट, मनोज नरेद्र कामत, सुवेदा पालकार, देवीदास गांवकार, वृषाली केळेकार वांटेकार जातलीं.

उक्तावण सुवाळ्याक जोडून साहित्य अकादेमी पुरस्कार फावो जाल्ल्या प्रकाश पर्येंकार, सुनेत्रा जोग, हर्षा शेट्ये, अद्वैत साळगांवकार हांचो भोवमान जातलो. समारोप सुवाळ्यांत कोंकणी भास, साहित्य आनी संस्कृतीच्या प्रचार आनी प्रसारांत विशेश योगदान दिल्ल्या आमेलिया डायस, फा. जायम कॉता आनी सुहास दलाल ह्या मानेस्तांचो भोवमान जातलो.

ह्या अधिवेशनाक भोव संख्येन कोंकणी समाजान हाजीर रावचें अशें आयोजकांनी मागलां.