भांगरभूंय | प्रतिनिधी
कोंब काडिल्लें कड्डण, डाळींब, गाजर, बिट, तवश्याचें कुडके खावचें. सदांच चुकनासतना सकाळीं आनी सांजवेळा झपाझप एक किलो मिटर तरी चलचें. अॅसिडिटी रोखडीच ना जातली.
भलायकी
हालींच्या जायत्या भुरग्यांक अॅसिडिटीचो खूब त्रास जाता. जेन्ना आमच्या पोटांतली गॅस्टीक ग्रंथी चड प्रमाणांत अॅसिड तयार करपाक लागता तेन्ना आमकां अॅसिडिटी जाता. मनशाक जेवण, खाण घरांत शिजता ते खायन दिसता. पूण अॅसिडिटीक लागून तो खावपाक फाटीं फुडें जाता. कितेंय खाल्लें काय ताका धेंकर येतात.
अॅसिडिटी जावपाक तशीं खूब कारणां आसतात. थोड्यांक चड मसाल्याचे चमचमीत पदार्थ खावपाची संवय जडिल्ली आसता. नोकरे निमतान भायल्या गावान वचपी तरणाटे मेळटा त्या पदार्थाचेर ताव मारतात. वडा- पाव, मिरची, कांदा भजीं फुटपाथाचेर गरमागरम मेळटात म्हूण दिसभर खातात.
दनपराचे, रातचे जेवले बरोबर रोखडेच न्हिदतात. थोडे रातभर मोबायलाचेर गेमी खेळटात. देखून तांकां जागरण जाता. ते जागरणाक लागून अस्वस्थ जातात. चिडचिडे जातात. तांकां आळस येता. सकाळचो नाश्तो नाका अशें दिसता. ते दीस कितें तरी निमित्त सांगून कामाक दांडी मारतात. ताणतणाव, हुस्को हें आनीक एक कारण. सिगार ओडप, सोरो पियेवप हाकाय लागून भलायकी इबाडटा. मात पसून व्यायाम करप ना, हें पसून धोक्याचें.
मनशाक अॅसिडिटी जाता हें कळपाक चड वेळ लागना. ताच्या पोटांत धवळटा. परत परत थुकी येता. ओंकारी आयिल्ले भशेन जाता. आंबट धेंकर येतात. गळ्या कडेन जळटा. अजीर्ण जाता. हे अॅसिडिटीचेर जायते घरगुती उपाय करूं येतात. कोथमीर रातची उदकांत फुगत घालून तें उदक सकाळीं पियेवप बरें. उपाशी पोटार तें पियेत जाल्यार अॅसिडीटीची समस्या सोंपता. जेवले उपरांत बडिशेप आनी खडीसाकर खाल्यार बरी. तोंड शुद्ध जाता आनी अॅसिडिटीय ना जाता.
काळीं पासां रातभर उदकांत भिजत दवरून तीं सकाळीं खावप फायद्याचें. कांय दीस अशें करून पळोवपाचें. अॅसिडिटीचो त्रास मात तरी कमी जातलो. जिवाकूय बरें दिसतलें. घरगुती जेवण शक्यतो जेवपाक जाय. तेलकट, मसाल्याचें खावप कमी करपाक जाय. ताक, धंय, लस्सी, आडसराचें उदक, गाजर, बिटाचें सूप, सालाद, कोंब काडिल्लें कड्डण, डाळींब, गाजर, बिट, तवश्याचें कुडके खावचें. सदांच चुकनासतना सकाळीं आनी सांजवेळा झपाझप एक किलो मिटर तरी चलचें. अॅसिडिटी रोखडीच ना जातली.
सिद्धी तिळवे
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
