भांगरभूंय | प्रतिनिधी
हां व वैजकी शास्त्राचो अभ्यासक न्हय. तेन्ना वैजकी शास्त्राचेर बरोवपाचो म्हाका अधिकार ना. हें हांव मान्य करतां. तरी आधुनीक वैजकी शास्त्र ही आधुनीक विज्ञानाची एक देण आसा आनी जे तरेन आधुनीक विज्ञानाचो उगम जालो तेच तरेन अॅलोपॅथी वैजकी शास्त्राचो उगम जाला. जे तरेन आधुनीक विज्ञानाक खर कसवटींतल्यान वच्चें पडटा तेच तरेन अॅलोपॅथी शास्त्राकूय खर चांचणींतल्यान वच्चें पडटा. थोडे भितर सांगपाचें जाल्यार अॅलोपॅथी वैजकी शास्त्राचो उगम विज्ञान पद्दतींतल्यान जाला आनी विज्ञान पद्दतीचो एक प्रामाणीक अभ्यासक ह्या नात्यान हांव अॅलोपॅथी वैजकी शास्त्राचें विश्लेषण करपाचो यत्न करतां.
सुरवेक विज्ञानाच्या प्रगतीक कश्या तरेन आडमेळी आयल्यो, गॅलिलिओ प्रकरण सरसकट मनशाक बरे तरेन खबर आसा. तेच तरेन वैजकी शास्त्राचेर प्रयोग करपाकय बर्योच आडमेळी आयल्यो. सांगपाचें जाल्यार, पयलींच्या तेंपार मनशाच्या मड्याचें विच्छेदन करपाक कायद्यान मनाय आशिल्ली. तशेंच कुडीचें विच्छेदन करपाक दोतोर उणाकपण मानताले. वैजकी शिक्षणांत शरीर रचनेचे पाठ शिकोवपाक दोतोर लेक्चर दिताले आनी कुशीन एका म्हाल्या कडल्यान मेल्ल्या माकडाचें विच्छेदन करून कुडीचे वेगवेगळे भाग दाखयताले. ते खातीर वैजकी शास्त्रांत चुकीची म्हायती मेळटाली. तरी कांय दोतोर लिपोवन प्रयोग करताले. निमणे वैजकी शिक्षणांत मड्याचे विच्छेदन कितलें म्हत्वाचें आसा हें कळून आयलें आनी 18 व्या शेंकड्यां उपरांत वैजकी शिक्षणांत मड्याचें विच्छेदन करपाक मान्यता मेळ्ळी.
सांगपाचें जाल्यार, त्या तेंपा वयल्या सगल्या तरेच्या वैजकी उपचार पद्दतींत मर्यादा आशिल्ल्यो. तशेंच सुरवेक आधुनीक वैजकी उपचार मुळाव्या अवस्थेंत आशिल्ले. तातूंत खूब दोश आशिल्ले. अशा उणाकपणाचेर बोट दवरून 18 व्या शेंकड्यांत दोतोर हैनीमेनान होमिओपॅथी उपचार पद्दतीचो विकास केलो आनी त्या तेंपार उदरगतीचे वाटेन वचपी आधुनीक उपचार पद्दतीक तुच्छतायेन ‘अॅलोपॅथी’ अशें नांव दिलें. अॅलोपॅथी ह्या उतराचो अर्थ ‘दुखण्याचो हत्यारो’ असो जाता. फुडाराक हेंच नांव प्रचारांत उरलें. दुर्दैवान होमिओपॅथिंतलीं सगलीं तत्वां विज्ञानीक प्रगती खातीर चुकीचीं थारलीं. ताचे उरफाटें अॅलोपॅथी वैजकी शास्त्रान आधुनीक विज्ञाना कडेन संबंद जुळयले आनी उदरगत जायत रावलें.
17 व्या शेंकड्यांत दोतोर हार्वेन कुडींतल्या रगताच्या घोळपाचेर येसस्वी प्रयोग केले आनी शरीर शास्त्राचेर नव्यान उजवाड घालो. फुडें कुडीच्या विच्छेदनांतल्यान शरीर शास्त्राची उदरगत जायत रावली. तरी भेरावपाच्या वखदां खातीर आधुनीक उपचार पद्दतींत बरोच नेट आयलो.
अॅलोपॅथी शास्त्रान नवीं वखदां निर्माण करपा वांगडा रोग निदान आनी शस्त्रक्रिया पद्दतींत क्रांतीकारी विकास केला. सुरवेक रोगाची चिकित्सा करपाक स्टेथोस्कोप आनी रगताचो दाब मेजपाक मॅनोमिटर अशीं मुळावीं साधनां आशिल्लीं. क्ष-किरण सोदा खातीर वैजकी रोग निदान प्रक्रियेंत आनी उपकरण निर्मितींत नवीन क्रांती घडून आयली. उपरांत सोनोग्राफी, सिटी स्कॅन, एमआयआर, लेझर आदी उपकरणां खातीर दोतोरांचे क्लिनीक एके यंत्रशाळेंत रुपांतर जालां. ताचो एक म्हत्वाचो फायदो म्हणजे रोग चिकित्सा करपाचे पद्दतींत वस्तुनिश्ठात वाडपाक लागली आनी चडांत चड भरवंशाची जावपाक पावली.
हेर खंयचेय परंपरीक वैजकी उपचार पद्दतींत रोग निदान करपाक कसलीच नवीन यंत्रणा विकसीत जाल्ली दिसून येना. मनशाचे चार रक्त- गट आधुनीक शास्त्रान सोदून काडल्यात. पॅथोलॉजी सारखी रोग निदान पद्दत तर आदीं अज्ञात आशिल्ली.
तेच तरेन अॅलोपॅथीन वखद निर्मितींत व्हड प्रमाणांत उदरगत केल्या. लस आनी माक्रोबायलॉजी खातीर मनीस जातीक धामींच्या रोगांतल्यान मुक्ती मेळ्ळ्या. देवी, कॉलेरा, पोलिओ आदी जीवघेणे रोग ना नपश्यात जाल्यात. पेनिसिलीन ह्या वखदा खातीर हजारांनी लोकांक जिवदान मेळ्ळें. आयज जरी ताचेर कांय बंधनां आसलीं तरी ताचे खातीर अॅन्टिबायोटिक वखदांचे अनेक प्रकार निर्माण जावपाक पावले. अॅलोपॅथींत खंयच्याय नवे ड्रगाक (वखद) आंतरराष्ट्रीय पांवड्यार खर चांचणीतल्यान वच्चें पडटा. तशेंच बरे वायट परिणामांचेर नेमान चिकित्सा जाता.
आधुनीक वैजकी शास्त्र फकत जीवशास्त्र आनी सुक्षीम- जीवशास्त्राचो वाठार उरूंक ना. नव्या- नव्या वैजकी उपकरणां खातीर अॅलोपॅथी शास्त्र दिसानदीस भौतीक, रसायन शास्त्रां सारकें मुलभूत (प्युअर) विज्ञानाचे दिकेन वचत आसा. तशेंच इलेक्रॉनिक्स, कंप्युटर आनी अणू-शास्त्र अशाय विज्ञानीक वाठांराचो आदार जावपाक लागला. ते खातीर वयर सांगलां ते प्रमाणें अॅलोपॅथी हें आधुनीक विज्ञानाचें एक आंग जालां म्हणून ताची नेटान उदरगत जावपाक लागल्या.
फकत अॅलोपॅथी खातीर आधुनीक समाजाच्या भलायकीचो दर्जो कितलेशेच पटींनी वाडला. मरणाचें प्रमाण खासा करून बाल-मृत्यूचें प्रमाण उणें जाल्लें आसा. सरासरी आयुर्मान वाडलां. लागीं लागीं सगल्या रोगांचे धामीचेर नियंत्रण दवरपाक येस मेळ्ळां. फकत अॅलोपॅथी उपचाराखातीर हें शक्य जालां. हें कोणय न्हयकारचो ना. कितलेय व्हड दुयेंस जालें तरी आधुनीक वैजकी उपचार पद्दतीन बरो जावपाचो विश्वास वाडत आसा.
तरी अॅलोपॅथी विशीं कांय चुकीचे समज जावपाक लागल्यात. एक म्हणजे अॅलोपॅथीचे ‘सायड इफेक्ट’ जातात. विज्ञानीक तत्वा प्रमाणे जाका ‘सायड इफेक्ट’ नासतात ताचे ‘इफेक्ट’ आसूं शकनात. ह्या तत्वा प्रमाणें सगल्या उपचार पद्दतींत सायड इफेक्ट आसपाक जाय. पूण ताचेर लोक आडनदर करतात वा ताचेर खोलयेन अभ्यास करिनात. पूण अॅलोपॅथींत आंतरराष्ट्रीय मळार सायड इफेक्टांचेर संशोधन सातत्यान चालू आसता.
एका तेंपार दोतोरकी हें मिशन मानताले. पूण आयज ताचे अती वेवसायीकरण जावपाक लागलां. ताका अनेक कारणां आसात. पूण ते खातीर अॅलोपॅथी शास्त्राक दोश दिवन जायना. तरी विशयाचो बरोबर अभ्यास नाशिल्ल्यान दुयेंत लोक हेर उपचारीक पद्दती कडेन वतात. दुयेंस गंभीर आसल्यार ताचेर फकत अॅलोपॅथीचेच उपचार जावं शकतात. नाजाल्यार फुडें ताचे वायट परिणाम जावं शकतात.
निमणें एकच सांगीन दिसता. आधुनीक काळांत आनी फुडाराक अॅलोपॅथीक पर्याय ना, कारण तें आधुनीक विज्ञानांचे एक मोलाचें आंग आसा.विज्ञानदूत श्रीकांत शंभू नागवेंकार
9096512359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
