अॅलोपॅथी आनी हेर वैजकी उपचार पद्दती

भांगरभूंय | प्रतिनिधी

गों यांत एक प्रथा आशिल्ली. आजूनय आसा. जिवाक बरें दिसना जाल्यार एक कुलेरभर फेणी घे म्हणून उपाय सांगी. थंडी जाली तर फेणी घे, पोट इबाडलें तर फेणी घे, अशे उपाय सुचयताले. म्हाका याद जाता फाटल्या शेंकड्यांतले नामनेचे मराठी नाटककार आचार्य प्रल्हाद केशव अत्रे हांचें ‘साष्टांग नमस्कार’ नाटक खूब गाजिल्लें. तांतलें मुखेल पात्र खंयच्याय भलायकीच्या समस्यांचेर ‘सूर्य नमस्कार’ हो रामबाण उपाय म्हणून सुचयतालें. अत्रेन आपल्या विनोदी आनी मार्मीक शैलींत समाजांतली अतिताय नाटकी रुपांत बरे तरेन मांडिल्ली.
वयलो प्रसंग याद करपाक तशेंच कारण आसा. सद्या भलायकी संबंदी अशेच तरेची अतिताय दिसून येता. योगा आनी परंपरीक उपचार पद्दतीन आपली तब्येत एकदम घट्ट, तंदुरुस्त उरता ह्या भरवंशार बरेच लोक फावो ते तरेन भलायकीची तपासणी करिनात. निमणें ताचे वायट परिणाम जावं येतात. योग हो रोगांचेर उपाय न्हय. तर कूड आनी भलायकी बरी दवरपाक तो एके तरेचो शारिरीक व्यायाम आसा आनी मानसीक संतुलन बरें उरता.
दुसरे वटेन अॅलोपॅथीक पर्याय म्हणून परंपरीक उपचारांची जे तरेन व्हडवीक जाता. तें पळोवन तातूंत अतितायेचो वांटो चड दिसता. आपल्या संस्कृततायेचो अभिमान म्हणून सगलें परंपरीक ज्ञान बरोबर मानचें काय कितें? निमणें प्रत्येकाची भलायकी मोलादीक आसता. जीव एकदांच मेळटा. ताचे कडेन प्रयोग करूंक फावना. ते खातीर ह्या प्रश्ना कडेन गंभीरतायेन पळोवपाक जाय.
तशें पळोवंक गेल्यार दर एका प्रांताचे वा देशाचे आपापले परंपरीक आनी घरगुती वैजकी उपाय आसात. इतलेंच न्हय आदिवासी जमातींचे आपले खाशेले वखदी उपचार आसात. जनावरां मदींय निजाचे उपचार आसात. मांजर वा सुणें जिवाक बरें दिसना जाल्यार जमनी वयली वनस्पती सोदून खाता. सांगपाचो मुद्दो, परंपरीक वा घरगुती वैजकी उपचार तशे नवे न्हय.
60- 70 वर्सां पयलीं अॅलोपॅथीच्यो सुविधा खूब कमी आशिल्ल्यो. त्या तेंपार ‘आजयेलो बोटवो’ म्हणजेच घरगुती उपाय चलताले. ल्हान भुरग्यां खातीर आमी आजूनय घरच्या जाण्टांचो सल्लो घेतात. पूण ते कितले परिणामकारक आनी भरवंशाचे आसताले हें सांगपाक जायना. देखीक: गावांगावांत कामीण, मुतखडो अशा दुयेंसांचेर वखद दिवपी लोक आसताले. दर एकट्याची तरा वेगळी आसताली. पूण हे उपाय फुडें चालू उरले नात. तेन्ना हे उपाय कितले भरवंशाचे आशिल्ले हाचो दुबाव येता.
आधुनीक अॅलोपॅथीक पर्याय म्हणून आमी अनेक परंपरीक आनी प्राचीन वैजकी शास्त्रांचो आसपाव करतात. सिद्ध, आयुर्वेद, योग, युनानी, अॅक्युपंचर व होमिओपॅथी आदी उपचार पद्दती पुनर्जिवीत करपाचे यत्न जातात. व्यायाम, योग आसनां, मसाज, अॅक्युपंचर अशा पद्दतींक आधुनीक वैजकी शास्त्रांत कांय प्रमाणांत मान्यता मेळपाक लागल्या. पूण फकत परंपरीक प्रकार म्हणून ते मान्य करप बरोबर दिसना. म्हत्वाचें सांगपाचें म्हणजे, परंपरीक वैजकी पद्दती उणें पडपाक लागल्यो म्हणून आधुनीक वैजकी शास्त्राचो उगम जालो, हें मतींत धरपाक जाय.
पर्यायी उपचार पद्दती बाबतींत खूब चुकीच्यो समजुती आसात. पयलो समज, हर्बल म्हणजे आयुर्वेदीक मानप, हें बरोबर जायना. कारण म्हणल्यार अॅलोपॅथीतलीं वखदां सैमीक वनस्पतींतल्यान तयार करताले आनी आजूनय करतात. देखीक; मलेरिया रोगा वयलो ड्रग सिंचोना झाडाच्या खोडा सावन तयार जातालो. पेनसिलिन हो एक सैमीक बुरशीचो प्रकार आसा. मॉरफीन ड्रग हो तर अफूचोच भाग. आजूनय खूबश्या अॅलोपॅथींतल्या ड्रगांची (वखद) निर्मिती सैमीक वनस्पतींतल्यान जाता. अशा वेळा हर्बल हो प्रकार वेगळो कसो मानपाचो?
दुसरो मुद्दो तितलोच म्हत्वाचो आसा. पर्यायी, अॅलोपथी सोडून हेर वखदांचे ‘सायड इफेक्ट’ जायनात हो समज अज्ञानांतल्यान वा चुकीच्या प्रचारांतल्यान आयला जावं येता. सैमीक वनस्पतींत जशे बरे गूण आसात तशेच वायटय गूण आसतात. कांय वर्सां पयलीं मराठी कलाकार आदेश बांदेकर हाका कोंकण दुदयाचो कोडू रोस पिवन विखारी बादा जाल्ली. मरणांतल्या तो वाचलो. त्या वेळार ताचे व्हिडियोय आयिल्ले. कोंकण दुदयाचो रोस जिवाक बरो अशें सगलेच मानतात. खंयचेंय वखद अती प्रमाणांत कुडींत गेले तर ताचे सायड इफेक्ट जातलेच. हें सगल्या वखद प्रकारांक लागू जाता. विज्ञानीक तत्वा प्रमाणें जाका ‘सायड इफेक्ट’ नासतात ताचे ‘इफेक्ट’ आसूं शकनात.
तरी परंपरीक वखदी प्रकार पुरायेन न्हयकारप योग्य जावंचें ना. प्रत्येक प्रकारांत उणेंपणा आसात. पूण आधुनीक अॅलोपॅथी वखदांचें जे तरेन संशोधन जाता. जे तरेन तांच्यो चांचणी जातात आनी जे तरेन कडक बंधनां पाळचीं पडटात. तशें हेर पद्दतींत जावपाक जाय. तशेंच खंयच्याय नव्या वखदाक आंतरराश्ट्रीय भलायकी संघटनेची आनी सरकारची मान्यताय मेळोवची पडटा. हे बाबतींत आमी चीन देशाची देख घेवपाक जाय.
चीन वैजकी यंत्रणेन परंपरीक उपचार पद्दतींचो उपेग करून मलेरियाचेर बरो वखद सोदून काडपाची मोहीम हातांत घेतली. तु युयु हिच्या फुडारा खाला खासा संशोधन यंत्रणा राबयली. चिनांतल्या परंपरीक वखदांचो शास्त्रीय पद्दतीन 20 वर्सां अभ्यास करून मलेरिया रोगाच्या आड नवें ड्रग सोदून काडपाक येस आयलें. 2015 वर्सांतलो वैजकी नोबेल पुरस्कार तिका फावो जालो. 2011 वर्सा चीन मलेरिया मुक्त राश्ट्र म्हणून जाहीर जालें. सांगपाचें म्हणजे आयुर्वेदांत अनेक वनस्पतींचे वखदी गूण सांगल्यात. वयल्या चिनी प्रयत्नांचें अनुकरण करून तातूंतल्यान गुणकारी ड्रग सोदून काडपाचे यत्न करचे. ते निमितान संवसारीक वैजकी संस्था आयुर्वेदा कडेन शास्त्रीय दिश्टीकोनांतल्यान पळयतली.
आधुनीक समाजाच्या भलायकीचो दर्जो फकत आधुनीक अॅलोपॅथी खातीर वाडला. ते खातीर लागीं लागीं सगल्या रोगांचेर नियंत्रण दवरपाक शक्य जालां. हें कोणच न्हयकारूं शकना. निमणें सांगपाचें म्हणजे खंयचीय वखदी पद्दत उणाक लेखपाक जायना. तरी ज्या नेटान अॅलोपॅथी वखदी शास्त्राचो विकास जाता तें पळोवन फुडाराक अॅलोपॅथीक पर्याय ना, अशेंच म्हणचें पडटलें.

विज्ञानदूत श्रीकांत शंभू नागवेंकार
9096512359