भांगरभूंय | प्रतिनिधी
पणजी : पॅराग्लायडींग तशेंच हेर अॅरो स्पोर्टसांत (हवाई खेळ) वांटो घेवपा खातीर लोकांक (गिरायकांक) हमीपत्र दिवप सक्तीचें आसतलें. सान पिरायेच्या भुरग्यां खातीर तांच्या पालकानी हमीपत्र दिवंचे पडटलें. पर्यटन खात्यान पॅराग्लायडींग तशेंच अॅरो स्पोर्टसा खातीरचे नेम निश्चीत करपी अधिसुचोवणी जारी केल्या.
ऑपरेटरांनी घेवपाची सुरक्षा, शुल्क, नेम मोडल्यार दंड हे विशींचो आस्पाव नेमांत आसा. पॅराग्लायडींगा वेळार अपघात जावन मरण येवपाच्यो घडणुको घडल्यात. हाका लागून पर्यटन खात्यान नोंदणी शुल्क वाडोवपा सयत सुरक्षा नेम तशेंच अटी खर केल्यात. ऑपरेटर तशेंच कर्मचाऱ्यांक प्रशिक्षण सक्तीचें केलां. सुरक्षा नेम तशेंच अटींक पाळो दिलो ना जाल्यार दंडाची तजवीज आसा.
जो पर्यटक वा हेर मनीस पॅराग्लायडींग वा अॅरो स्पोर्टसांत वाटो घेवपाक सोदतात ताणें ऑपरेटराक हमीपत्र दिवप सक्तीचें आसा. हमीपत्र घेतले बगर खंयच्याच मनशाक अॅरो स्पोर्टसांत वाटो घेवपाक दिवचे न्हय, अशें बंधन ऑपरेटराचेर आसा. ऑपरेटरान हें हमीपत्र घेवन सांबाळून दवरपाक जाय.
‘अॅरो स्पोर्टसांत वांटो घेवप हें धोक्याचें थारपाची शक्यताय आसता. अपघात जावपाची शक्यताय आसता. भलायकी लेगीत इबाडपाची शक्यताय आसता. हे सगले धोके जाणा जावन आनी आपले जोखमीचेर हांव अॅरो स्पोर्टसांत वांटो घेता. भलायकेंत इबाड जालो जाल्यार उपचारा वेळार जावपी खर्चाची भरपाय हांव करतलो. हांवें सोरो वा घुंवळे वखदां घेवंक ना’, असो हमीपत्राचो मसुदो आसा. ह्या मसुद्याचेर सय केले उपरांतूच अॅरो स्पोर्टस वा पॅराग्लायडींगांत वांटो घेवपाक मेळटलो. तशेंच सान पिरायेच्या भुरग्यां खातीर पालकांनी हमीपत्र दिवचें पडटले. अॅरो स्पोर्टसांत वांटो घेवप धोकादायक थारपाची शक्यताय आसता. हांवें म्हज्या भुरग्याक वांटो घेवपाक परवानगी दिल्या, असो हमीपत्राचो मसुदो आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
